Maansadan oo uu curiyey Abwaan Maxamuud Sheekh Cali Siciid (Caways Bahale), waxa uu soo baxay 09/09/2013, waxa uu isugu jiraa waddaniyad, garnaqsi, waano iyo kaftan-sugaaneed oo ku socota siyaasiyiinta dalka, gaar ahaan Madaxweyne Siilaanyo, Wasiirka Madaxtooyada iyo Madasha Wadatashiga iyo Toosinta Qaranka.
Wajaq iyo is-moodsiis
Dar wadkoodii galay iyo
Waafigii ku bahaan
War yar kaaga sheegiye
Weedhaydan qun u maqal
Wegereey ma garateen
Wacadarahan gilgilay iyo
Iyo gorayo khaakhlayn
Waddanigaa dhur-sugayoo
Dhawraayey guul qaran
Goobtii la furiyo iyo
Geedigu hadduu degi
Tudhaal gaws-qabsanayoo
Surbacaadka gaajada
Gaagaabsan cabshiyo
Gunaadka iyo nabarada
Taaha iyo goohaba
Gaadhka iyo ilaalada
Gedi layl ku foognaa
Gunno ugu duudaynee
Gobonimo ka saanyadaa
Goob lagu faqaayiyo
Golo la isu wacay yimi
Moodyey gacal ku farax iyo
Gobaad baa dhashu yidhu
Gabashadu dhegaystuu
Gobo’diyo xogtii helay
Garabkayguu taabtoo
Go’iwaaye maandhaw
Maragtaa giniistani
Gaadiid qaadkan baaqdiyo
Gumarada isku baawayn
Lama fila iyo gurin tira
Waaye odhon ka guray xalay
Wuxu yidhi god-qode dheer
Iyo gumaro xeel foge
Goolaaftan cabashiyo
Garnaqsiyo is-yeelyeel
Tookhe gorayo khaakhlayn
Nin baa baan guban
Ku gunaanad gabay maqal
1. Xaashi baa gabyoo yidhi
Dhitadaan gunneeyeen
Gaarka u kobcinayeen
Gabashada bulshada sugay
Inta ay gam’ayseen
Gadaal aan ka guri rabay
Lama fila iyo gaadmo xun
Siilaanya goor baas
Gudbi yidhi xilkoo dhiib
Gagabkaan ka qadaan
Golahan u abuuree
Gar miyaad ka weyntiin
Ginni kama haleeline.
2. Xasan baa gabyoo yidhi
Miyeydaan i garanayn
Balligubadle sawtaad
Ku-xigeen guddoonshe ah
Siyar garabka la ii sudhay
Dalka guda galkeenii
Tuurbaa ina galalafoo
Gacal-tooyo dhaawacee
Go’aan miyaaban ku lahaa
Soo gudubtay..gudubtoo
Gu’yaal aan dhursugayoon
Iska waayey gole qaran
Xusbigaan u gogol-dhigeen
U guntaday maxa gabay?
Axmed-dhegax gadoodkii
Golaftankii Arab
Maxa lagu gudbayaha?
Ma sanuunshay garashaday
Guushaydii waxay taal
Golahane i garab gala.
3. Faysal baa gaboyoo yidhi
Xaggu gebi xagguna gebi
Guntu wallac dheh xaajadan
Doorashayo laba galay
Gacmo madhan go’aan noqay
Horrena waxa i gunayn jiray
Guuraha shir la is wacoo
Casho, guunyo kabis iyo
Jeegag gudub socdoon gu’in
Riyaalana gaduu rabaan
Guddoon aan ku siin jiree
Guddoonshaa igu soo hadhay
Xusbigayga gebigii
Xataa ganaca dhiiboo
Jamaal ina Xuseenoo
Jeebabku u gingimanyiin
Milyan gini wax kaga gaday
Hadduu go’ay kiniinkiina
Siilaanyana gardiid noqay
Jeeba gacanta gelin waa
In aan gudub ka dego oon
Garab cararo gaadhiga
Gole hamashkan soo Waco
Wada ila gashay afgo’a
4. Dhega-weyna gabay baan;
Gedahan jicsiman jiray
Garabo goosi sibidhikiyo
Gacan-dhiibka haamaha
Googoosi tuub xad
Gadistiyo dilaalkii
Dayday u garaadayn
Dekeda iyo cashuurahaan
Gebirka aan ka guri jiray
Siilaanyaa gooyoo
Guryahaygiibaa ba’ay
Haba gubato Lantuye
Gefkan dhacaan gole u wacay
Gebagebaan horsed ahay
Iyo gulufe ha u dagan.
Dhanka kale dhugtoo idhi
Xirsooyo go’aankiyo
Adiguna gadaa sheeg
5. Xirsibaa gabyoo yidhi;
Gaban ba aniga ii daa
Cilmi iyo gorfayntiyo
Garashana umaan negi
Goobtan aan ku suganahay
Gadh-caddiyo ged-weyntii
Siyaad uu gardaadshaa
Ka gubtoo colaadiyo
Guluf weerar aan demin
Ii laba gacmoodshoo
Ged kastaba adeegsaday
Goortaan yaqiinsadaan
Ana aan difaac galay
Gaydhkoon ka xidha iyo
Gudbintoodaan diidiyo
Gabay inaan u tiriyaba
Iyaga iga galabsadoo
Nabadi waa iga garanuug
Gacma taag is dhiibiyo
Jeeray weerar gooyaan
Gartaan inaan dhigooda ahay
Goobo iyo meeriyo
Gantaalaha ridada dheer
Gujiskay ii istaadhanoo
Waa i guri dhufayskuna
Gaagaabsi waan dhigay
Dub u gurasho ma aqaan.
6) Waddani gabyoo yidhi;
Garashoo ba’ buu yidhi
Garbiga iyo quudhsigu
Inkastooy gad-jaan iyo
Xasad gurin-tir uu yahay
Nacas guul ha moodee
Waxaad gool ku dhalisaa
Godka kaad u qodaysiyo
Dhukus gaadmo ruxaad
U maleegi geerida
Intuu gama’san yahee
Wali aanu kugu garan
Sidaan waa iskaga goyn
Gedaan jirana maan arag
Ma aan garan gufaacadan
Wanjal way ka gudubtoo
Goolaftan dhaaftee
Tani maa iskaga goyn.
Markaan goobay aragtida
Genbigii dalkeeniyo
Tani waa iskaga goyn.
Geenyada ha laga dego
Ninka samaha gasirow
Rag colaadii kumaad guban
Dhanka kale golow fahan
Gedigiiba shacabkanu
Madaxweyne guunoo
Guddoonshe uu doortoo
Goolaha waxqabadkana
Gedi waynu aragnaa
Garab qabashadiisiyo
Guulayso ma ogiye
Gol-qaniina kama mudan
Dhan kale golow fahan
Ha ku dagan bulshadan
Gogol giringiris ku siisee
Bustahay gembida iyo
Gadoodna wuu ka dhaw yahay
Calankay ka gaadh tahay
Googa dheh cigale
Guntin furisteed weeyaan
Xirsow goobtaad joogtaa
Waa guri muwaadinoo
Dulqaad iyo ka goosada
Goob waliba xeerkeed
Go’aan qaadasho xilkeed
Kala gaar lahaatee
Ha godbinoo ha gaydhine
Sinaan loo gudboon yahay
Gudbi oo ku gacan-qabo
U fur gaydhka wixii gara.
Dambay mooday gar u eeg
Gefna ha igu noqtee
Madaxweyne golahanu
Raggan guurtidee lumay
Hadday sidan garmoodeen
Waayeel gafay u tudha
Iyaba way garaabiye
Gogol sooryo gobonnimo
Gurigaaga ugu yeedh
Gaagaabsi wax u sheeg
Gacaltooyo kula xaal
Cadaw guunnaba tuban
Guulba inaga sugayee
Laba geedi baa u hadhee
Kula eero gobonnimo
Xilkas guusha odaynimo
Ku gunnaanad xaajada.