Yaab, shaamareer, amakaag iyo dhabanno-hays ayaa dhashay kolkii la maqlay gabadh xaas ah xalaalna lagu qabay, oo ku kacday fal dibindaabyo ah inay hoosta kala heshiiso nin kale! Miyaanu garaad lahayn ninka afka u dhuubaya afo islaamnimo lagu meheriyay? Ma cid kale ayuu waayay? Muxuuse filayaa markuu sidan sameeyay?
Dadkii xog-ogaalka u ahaa dhacdadan mid ka mid ah oo is-hayn kari waayay ayaa aragtidiisa ku muujiyay suugaanta uu murugo ugu wan-qalay… Wuxuu yidhi:
Waxaa minan loo dhisaa
Qofkii muuniyo tixgelin
Dhiggiisa u muujiyee
Qofkaad milaygii kal hore
Milgaa u samaysay guur
Hadday midabyaal qarsoon
Haddeertaba muujisooy
Maleegtay gad aan la filin
Bagaad dalqaddii markaba
Abwaan run ka saartay midig
Markay tidhi “maammadaa
Intaan kaga siiyo malaq
Ayaan dhiiggeeda miran
Xigaalkuna waa mur iyo
Dad aan maskaxdaydu rabin”
Maskii kuu dhuuntayee
Wanaaggaba aan maqlayn
Xumaa u mashxaradi jiray
Intaan micidiisu korin
Bagaad “Kaa maarmay” tidhi
Mashaakil hadduu alkumo
Masuulkiyo waalidkaa
Inay maslaxaad unkaan
Heshiis marti looga yee
Kolkuu maagaabki dhalay
Intuu milyanaadki cunay
Haddana isa soo mutuxay
“Yartayda ma muuliyo
Furriin baan muhanayaa”
Waxaan micne badan lahayn
Shirkiyo madashii la yimi
Bagaad soddog aan mudnayn
“Yartaada la muuf” ku tidhi
Magaalka warkiisa iyo
Xogtaan maqlay baan fajacay
Horaa meher loogu xidhay
Qofkaad ugub moodaysoo
Bagaad qof la maalay tidhi
“Marwiyo xaas iima tihid”
Intii ad madluufisay
Qudhaadi mafsuuddayoo
Naftii murug daysayood
Lib iyo farax weyn mulkiday
Nimay gabadh xumi mirtaa
Ifkuu ku madluun noqdaa
Gankiisana lama murmee
Bagaad middidii haliil
Musbaarki jidhkaaga muday
Miishaar ka fogaatayood
Ku tidhi “Mudankaaga hoo”.
Haddeer dhir magoolay iyo
Man iyo ubax raadiyoo
Mushaax arligaago mudan
Gayaanka ka miidho ruux
Wanaag marag looga yoo
Illaw mililkii ku helay
Saaxiib kale oo ay wiilka isu-dhawaayeen ayaa tiiraanyada dhalatay ku cabbiray tixdan
Bi’i waa hubsiimooy
Degdegoow belaad tahay
Beeneey lur baad tahay
Saaxiib dhab barashadu
Waa buug xusuus mudan
Balaggii laguu lulay
Wuxu haa barkumataal
Adigoo bar roobliyo
Dhul barwaaqo joogaad
U hayaantay buur aan
Baad doog lahaynoo
Adaa bagagi kuu daran
Boqray oo dhabeel
Qaryad bilan ku sheegoo
Baxar iyo adaa halis
Nafta biime geliyoo
Inkastood baqoolkii
Beegsiga is tidhi aad
Dhul baldhoole iyo maadh
Ka baxeen dareemadu
Alleylehe bus iyo
Beercaddaad rafaad luu
Bacadlihi u geeddiyay
Bido waxay mashxaraddaa
Marka uu billaawuhu
Boqnaheeda gooyoo
Waa laga baroortaa
Reer baaba’aayee
Markay baydki taagnaa
Burburkiisa fulisay
Qosol beer-caddaatee
Haddii ay baraad iyo
Maskax buuran leedahay
Booyid baa u roonayd!
Basar iyo asluub wacan
Qofka lagu barbaarshaa
Ixtiraamka badiyee
Baraday ku ababtaa
Buuq iyo lahaa yuus
Haddii uu belbelo holac
Baansiin wax guba iyo
Batrool laguma daadshee
Saaxiib bahdeedaa
Boholaha ka tuuree
Barxaddeedi iyo qoys
Haddii ay ka buriyeen
Haba baayaceenoo
Munaa baydka tumashiyo
Hay fureen bakhaarrada
Boolida jidh lagu gado
Naag-xumi belaayiyo
Bogcad naara weeyoo
Buulkeeda wiil galay
Ku badhaadhi maayoo
Bahda iyo faciisana
Lama baratamaayee
Marki dulinku baashiyo
Barbarkaaga joogsaday
Bilicdii naftaaduu
Baarasaytku doorshoo
Berigaad dalaaqdaad
Dib u soo bidhaantee
Beddel aayatiin laad
Biligaaga helaysaa
Boqollaal leh joogoo
Barashiyo leh diinoo
Naftu ay u bogaysaa
Beledkeenna joogee
Bisaddii hagaastee
Bu’da araggu diideen
Waa inaad boggaagiyo
Beerkaba ka saartaa!
Qalinka Yaasiin Axmed Cabdi