Waxa aynu qormadan 8aad ee Hidde-raac: Hilin-sooyaalka iyo Hawraarta Hal-abuur Hargeysaawi ku soo qaadanaynaa tix magaceedu yahay hilin toosan oo curatay gu’gii 2006-da.
Maansadan Abwaan Siciid Maxamuud Gahayr, wuxuu ku tilmaamayaa habka iyo wadada saxda ah ee lagu gaadhi karo wadamada hore umaray, waxaanay guubaabada ugu badan siinaysaa dhallinyarada oo ah laf dhabarta bulshada.
Meelaha ay maansadu diirada saarayso waxaa ka mid ah samirka iyo wanaagiisa,shaqada iyo midhaheeda,dadaalka iyo aayihiisa ,aqoonta iyo waxtarkeeda,diinta iyo ku dhaqanteeda samaha laga helo,qaadka iyo qabyaalada dhibaatooyinka laga dhaxlo,dhoofka ku hamigiisa in ay ka habboontahay dhulka oo la hawl gashado , lana aamino ciidda hooyo, waxaanu abwaanku maansada ku bilaabay
Had kastaba cidii
Hadlaysee alkuman
Geeribaa hurrane
Dhagax waa halkane
Warka haatuf iyo
Hudhud baa udiran
Heego duulayoo
Taariikh hadhaa
Kala haadisoo
Hayinkiyo ratiga
Haamaha rariyo
Layli kala hufane
Waxay kala huftaa
Hor-fulaha san iyo
Ka habsaanka ahe
Hoggaankii la rabay
Dalka inuu hagoow
Dhallinyahay hufani
Idinkaa hantiyay
Hilbo xooggan iyo
Garaad heeganee
Duqay hawl gabiyo
Mid hadaaqayaba
Hormoodkii bulshada
Hirsan gaynayoow
Halbawluhu qofkii
Aanu dhiiga habin
Halis buu darsee
Horseedkii shacbigu
Waddankuu hurdaa
Ma hayaamayoo
Haradiyo biyaha
Hibaaqiyo nimcada
Hodanimo adduun
Hiigsan maayo oo
Ma haabhaaban karo
Hirarkii saree
Hiimsahiimsihiyo
Nimaan hiirta kicin
Habeen iyo dharaar
Heensayn nafteen
Hodadaamo iyo
Hurgunmaba wajihin
Huluul iyo lur marin
“Hoo” lama yidhaa
Wuxuu hibanayee
Hawadiyo dayaxa
Heegada koreba
Horaa loo dagoo
Dayuuraad hugmuu
Hal-abuur dhisee
Haadkiyo wadada
Hilinkay socdeen
Haddaynaan ku dayan
Talaa hoosaysee
Hakrashada nacoo
Hanaqiinu samir
Haddii uu hadhsado
Libta waa la heli
Dantu way hirgali
Himir waa la guran
Hoggaankii la rabay
Dalka inuu hagoow
Dhallinyahay hufani
Duqay hawlgabiyo
Mid hadaaqayaba
Hormoodkii bulshada
Hirsan gaynayoow
Jahligaa ah holac
Heeryo kugu raroo
Ku habsaynayoo
Gankaa kaa hadhsoo
Harraad kugu ladhee
Aqoon waa hillaac
Hadhac damala oo
Hadh qabow leh oo
Hareeteeda ruux
Ka hirqanaya oo
Wakhtigana huraa
Hantay guul dhabee
Higaaddiyo tacliin
Hanashada cilmiga
Ummaddaan ku hiran
Hammigooda iyo
Himilada qorshuhu
Wuu hungoobayaa
Intaydaan hog galin
Hiyigiina abid
Ha ka saarinee
U hollada aqoon
Haween iyo ragoow
Hanuunka iyo diin
Hadalada Ilaah
Hawraar Rasuul
Haye kii la yimi
Een kala hambayn
Lama hoojiyee
Halisaha ifkaa
La hareer duwaa
Hibo iyo ladnaan
Hooduu mutaa
Hebednimada iyo
Hooy buu ka galay
Cudurada hiroo
Halasaha faqriga
Kol ma halacsadee
Giniguu hayuu
U hanwayn yahoo
Heemaal qurxoon
Hoobaan Farduus
Qiyaamaha halkii
Haqab-beelka luu
Hanjab li”i nastaa
Hargab iyo gabaw
Gaajiyo harraad
Waa laga hadhshee
Ka horoo dar khayr
Ha hallaabinina
Hoggaankii la rabay
Dalka inuu hagoow
Dhallinyahay hufani
Duqay hawlgabiyo
Mid hadaaqayaba
Hormoodkii bulshada
Hirsan gaynayoow
Haleelada dhashaa
Hadhuub loo cushaa
Wax hanaan leh baa
Qudha lagu habaa
Hammuun looma qabo
Mid huq keenayee
Kuwii hiigay qaad
U hiloobayee
Lacagtaw huree
Hadyad moodayuu
Hanqaaruu dhib iyo
Hiirtaanyo baday
Wuu habaaranyoo
Samo lagama helo
Hurdaduu jaraa
Hadris buu unkaa
Hawo caafimaad
Wuu haraatiyaa
Hanti kaa lunshaa
Dhaqaalaha hirdiyi
Hammi iyo qamuu
Kuu horseedayaa
Shakhsi habayacaa
Ka hadh aan kasine
Wuu hagaagsanyoo
Hambalyaan idhee
Hadraawiba ka giig
Hankiisana ka jar
Hunguraynta jaad
Hantaaq beerayee
Halyaygaasi raac
Ha u heelanaan
Haawadayga xune
Halmaan oo illoow
Hogoshiyo rugtuu
Mayay hoorayaa
Habsan ugu da”aa
Hanti loo raraa
Wax aan hilaw qalmayn
Ha u haadin gacan
Hayb-sooca iyo
Hirashada qabiil
Reer hebelnimaa
Na habsaamisoo
Haadiga Raxmaan
“Ka hadhuu” yidhoo
Hogga loo caddee
Hanadkii Suldaan
Halganbuu u maray
Inan hiifno oo
Waa hoseeg suniyo
Leeb hadoodilmoo
Hubka iyo warmaha
Holacay shiddaa
Lagu hoobanoo
Horor iyo libaax
Intuu laayay halaq
Intay hooysaybaa
Hubaashii ka badan
Hayaankii la waday
Way heeraysaa
Heshiiyoo midnimo
Hal ku wada noqdoo
Qudhun huursan iyo
Huubaha quboo
Ka hakada ardaa
Hirdankiisibaa
Ku hagaasiyee
Hoggaankii la rabay
Dalka inuu hagoow
Dhallinyahay hufani
Duqay hawlgabiyo
Mid hadaaqayaba
Hormoodkii bulshada
Hirsan gaynayoow
Ruux kale hugii
Noqon waa hagoog
Astur lagu heloo
Hohob laalan taad
Hadda haysataa
Ka haboon waxtarid
Hanqal taagistiyo
Inad halacsataan
Hummaageeda Yurub
Wax ka haybad bilan
Haamaddiina iyo
Maankoo hindisa
Hawlgalkii dhulkeen
Hadaafinayayee
Horu marinayee
Heer wacan ka dhigi
Hargaysiyo arligan
Inna wada hurrane
Labka iyo habloow
Halcashada gadaal
Haakah baa xigtee
Hambaabira maruun
Khaddar Maxamed Faarax
khadarmfr@gmail.com