Gabaygan waxa loogu baroor-diiqayaa alle-haw-naxariistee, marxuum Abwaan Muuse Aaye Faarax, oo ka mid ahaa ilayskii abwaanada geeska Afrika, oo Jimcahii 17-August-2012 lagu aasay Hargeysa, waxa habeenimadaa jimcaha curiyey abwaan A.A.Garas. waxaanu ku bilaabay:
Cabdil-qaadirow, dhimasho waa lagama cawdaane;
Cimri-dherer-ba, gabow bow coloo looga caal heline;
Caruuska iyo dhimashays-ku xiga waa casaadaba’e;
Dhaaxay nimaan caan ahayn noo cambariyeen’e;
Xiddigahan casuustiyo cirkaa ximirku caaryeystay;
Cumdahaa galbaday buu ogyihiyo caaqilkii Aaye;
Culayskuu lahaa buu dayaxu caad la meersadaye;
Calaamaadkii Weli inuu lahaa waxa cadeynaaya;
Caarada danbaysee bil soon laga cibaadaysto;
Cishadii khamiisti iyo jimcaha lagu carowsiiyey;
Cawo iyo ayaan buu lahaa caaqilkii Aaye;
Cabsi lama tusaayiyo isaga meel cidhiidhiyahe;
Innagaa cadceed weynay iyo calankii sheed-dheere;
Ciirsi li’i dhul baa haawadoo ciyowgu ooyaa’e;
Cawskiyo iyo dhirtaa ciirtayoo qubay caleentiiye;
Cadaab lama tusaan waxuu ahaa ruux cajaa’ib ahe;
Caqiibooyinkuu dhigay hadaan cidhif tusaaleeyo;
Gumaysigii cadaa geesiyadii caymanka u gooyey;
Ee ciidda Somaliland cawda uga laabay;
Cartankii Siyaad lagu ridiyo celiyeydii guusha;
Carab danablihii buu ahaa cadowga naafeeyey;
Cirsan yeedhkii guubaabadee taliska cayn qaaday;
Ee ciidamada dhiiriyee cududda weyn beeray;
Caroogii libintuu ahaa Muuse caliyowe;
Cadaab lama tusaan waxuu ahaa ruux cajiib badane;
Colaadihii sokeeyaha markii curufku oogmaayey;
Caqligii siyaasigu markuu caannad tari waayey;
Ciroolahii guntayaday ee arlada nabada caynaanshey;
Cadkuu geesi kariyuu fuluhu cuni ogaadaaye;
Ragii tallada ceelka u galee cadday ka dhuubnaaday;
Kacaankii Cigaal niman qarkii loo cayimay hawsha;
Caqabadaha ragii nagu guruu noo cugnaan jiray;
Carradaa nagaatiyo dalkaa haatan lagu ceesho;
Cutubkii rakibay buu ahaa Muuse caliyowe;
Cidba la sinayn Muuse Aaye curinta suugaane;
Caalamkoo dhan baa laga ogyuu caarif ka ahaa;
Cumdihii abwaankuu ahaa cuur la hoos tagee;
Cilmi barashadiisuu ahaa caalim dhaqameede;
Ciliyiinka jannadii ahayd caadil kugu soorye;
Canabkii fardowsaad rabigu kugu casuumeeye;
Wadankana cawilid khayr qabiyo caano nabadeed;
Dhamaad.
Waxa curiyey Abwaan A.A. Garas.