New York (SLpost)- Dalalka Ruushka iyo Shiinaha ayaa Codka diidmada Qayaxan ku horjoosaday Qaraar ka dhan ah Iiraan oo maanta ka soo baxay Golaha Ammaanka ee Qaramada Midoobay.
Golaha Ammaanka ee Qaramada Midoobay ayaa fadhi uu maanta yeeshay ka soo saaray Qaraar jidaynaya in xoog ama xeelad la furo marin-biyoodka xidhan ee Hormuz, kaas oo ay ka gudbaan boqolkiiba 20 shidaalka iyo Gaaska laga isticmaalo adduunka.
Qaraarka oo ay dabada ka riixayaan Xulafada dalka Maraykanka, ayaa gebi ahaanba fashilmay markii ay dalalka Shiinaha iyo Ruushku awooddooda diidmada Qayaxan ku horjoogsadeen in la ansixiyo. Arrintan ayaa muujinaysa kala qaybsanaanta weyn ee siyaasadda caalamka, gaar ahaan arrinta Iiraan.
Golaha Ammaanka ee Qaramada Midoobay oo ka kooban 15 Waddan oo 5-ta dal ee joogtada ahi ku jiraan, waxa in la ansixiyo oggolaaday 11 waddan, 2 waddan way ka aamuseen halka dalalka Ruushka iyo Shiinuhu ku gacan-saydheen.
Awoodda veto-ga ayaa u oggolaanaysa shanta dal ee joogtada ah (Shiinaha, Ruushka, Maraykanka, Faransiiska iyo Ingiriiska) inay joojiyaan go’aan kasta oo Golaha Ammaanku gaadho, xataa haddii inta badan xubnuhu taageeraan. Shiinaha iyo Ruushka ayaa awooddan u adeegsada si ay uga hortagaan cunaqabatayn ama tallaabooyin kale oo adag oo ka dhan ah Iiraan.
Labada waddan ayaa inta badan go’aankan u sameeya inay ka hortagaan in Maraykanka iyo xulafadiisu ay si fudud u adeegsadaan Golaha Ammaanka si ay cadaadis ugu saaraan dalal kale. Arrintan ayaa muujinaysa sida awoodda veto-gu u noqotay aalad siyaasadeed oo ay dalalka waaweyn ku ilaashadaan danahooda, isla markaana ay u qaabeeyaan siyaasadda caalamka.
Shiinaha iyo Ruushka waxa ay xidhiidh ganacsi oo xooggan la leeyihiin Iiraan, gaar ahaan shidaalka iyo gaaska.
Dalka Iiraan ayaa gebi ahaanba xidhay marinka Hormuz tan iyo markii uu bilaabmay dagaalka u dhexeeya Maraykanka iyo Israa’iil oo dhinac ah iyo Jamhuuriyadda Islaamiga ah ee Iiraan.
Taaladan ayaa noqonaysa markiii u horeysay ee ay labadab waddan toos ah u soo faro-geliyaan dagaalka Iiraan, iyadoo la rumaysan yahay in Shiinaha iyo Ruushku si dadban u taageeraan Iiraan.
Somalilandpost.news
contact@somaliladpost.news
