Madaxweynaha Somaliland Md Cabdiraxmaan Maxamed Cabdilaahi ayaa maanta isku shaandheyn ku sameeyey Golihiisa Xukuumadda, isagoo shaqada ka eryay saddex ka mid ah Golaha Wasiirrada.
Madaxweyne Cirro waxa uu xilalka ka qaaday Wasiirradii Wasaaradaha Horumarinta Biyaha Abubakor Good Wacays, Horumarinta Beeraha Maxamuud Cige Yuusuf iyo Isgaadhsiinta Jamaal Maxamed Jaamac, kuwaas oo xilalka hayey muddo ku siman sannad iyo badh.
Madaxweynaha Somaliland waxa uu Magacaabay 13 xubnood oo isugu jira Wasiirro, Wasiir ku-xigeenno iyo la-taliyeyaal, iyadoo masuuliyiinta la Magacaabay ay ku jiraan qaar ku cusub xilalka xukuumadda iyo kuwo Laysku beddelay.
Md Barkhad Batuun oo ka tirsanaa mudaneyaasha Golaha Wakiillada, ayaa loo Magacaabay Wasiirka Wasaaradda Warfaafinta, Wasiirka Cusub ee Wasaaradda Horumarinta Beeraha ayaa loo Magacaabay Siyaasi Aadan Geeddi Qayaad, halka Wasiirka Wasaaradda Horumarinta Biyaha loo Magacaabay Maxamed CabdiMaalik oo hore u ahaa Wasiir ku-xigeenka Gaadiidka. Wasiirka Cusub ee Wasaaradda Isgaadhsiinta iyo Technology-adda ayaa loo Magacaabay Dr Cabdisalaan Xuseen Cawaale.
Aqoonyahan Dr Maxamed Cismaan Fadal ayuu madaxweynuhu u Magacaabay La-taliyihii gaarka ah ee Siyaasadda Arrimaah Dibadda, halka KhadarXaaji Yuusuf Cabdilaahi uu madaxweynuhu u Magacaabay inuu buuxiyo xubin ka tirsan Guddiga Diiwaangelinta Ururrada oo kaddib markii uu geeriyooday xubintii hore loogu Magacaabay booskaas.
Waxa kale oo wareegtada madaxweynaha ku jirta wasiir ku-xigeenno iyo Wasiirul-dowleyaal xilal ka hayay wasaaradaha dowladda oo Laysku beddelay.
Isku-shaandheyntan ayaa noqonaysaa tii ugu ballaadhneyd ee madaxweynuhu sameeyo tan iyo markii uu talada dalka la wareegay dabayaaqada sannadkii 2024-kii.
