Addis Ababa (SLpost)- Diblumaasiyiin ka tirsan dawladda Pakistan ayaa markii ugu horreysay si cad uga hadlay qadiyadda madax-bannaanida Jamhuuriyadda Somaliland, iyaga oo muujiyey in Islamabad ay dib u eegis ku samaynayso mowqifkeeda ku aaddan arrintan.
Safiirkii dalka Pakistan u fadhiyay Magaalada Addis Ababa ee Caasimadda Itoobiya, Ambassaor Imran Yawer oo hadlay, ayaa caddeeyay in qadiyadda madax-bannaanida Somaliland aanay abuurayn xuduud cusub isla-markaana ay ku saleysan tahay xuduudihii Afrika ee xilligii gumeysiga, sidaa darteed ay Somaliland xaq u leedahay in dawladaha Adduunku aqoonsadaan, maadaama oo qadiyaddeedu salka ku hayso xuduudaha Afrika laga sameeyay xilligii gumeysiga reer Yurub.
Ambassador Yawer, waxa kale oo uu sheegay in ay muhiim tahay in la fahmo in Somaliland ay ahayd dawlad madax-bannaan 1960-kii, taasina ay ka dhigan tahay in ay haysatay aqoonsi caalami ah, ka hor intii aanay la midoobin Soomaaliya, isagoo intaa sii raaciyey in aqoonsiga Israa’iil ee Somaliland uu yahay dhacdo taariikhi ah oo kor u qaaday doodaha iyo falanqaynta ku saabsan xaaladda siyaasadeed ee Somaliland iyo xaqa ay u leedahay aqoonsi buuxa.
“Aqoonsiga Somaliland wuxuu ku saleysan yahay xuduudihii gumeysiga ee Afrika, sidaa awgeed waxay xaq u leedahay in la aqoonsado. Taariikhda Somaliland waxay ahayd dawlad madax-bannaan 1960kii, ka hor inta aanay ku biirin Soomaaliya,” Ayuu yidhi safiirkii hore ee Pakistan u joogay Itoobiya, waxaanu intaa ku daray, “Xilligan, Israa’iil ayaa dib u aqoonsatay Somaliland, waxaana aqoonsigaasi noqday isbeddel weyn oo diblomaasiyadeed, kaasoo horseedi kara in dalal kale ay ka fiirsadaan aqoonsi rasmi ah.”
Ambassador Yawer waxa kale oo uu tilmaamay dhaqdhaqaaqa aqoonsiga Somaliland ee ka socda daafaha dunida “Marka laga hadlayo aqoonsiga Somaliland, waxa la hubaa in dhaq-dhaqaaqa caalamiga ah ee ku saabsan aqoonsigeeda uu ku socdo jihada saxda ah. Sidoo kalena Aqoonsiga Israa’iil uu yahay isbeddel weyn oo caalami ah, waana tallaabo horumar leh oo horseedi karta in Somaliland ay hesho aqoonsi ballaadhan oo caalami ah.”
Hadalka Yawer, ayaa dibedda u soo saaray in siyaasadda dibedda ee dawladda Pakistan wax iska beddeleen isla-markaana xidhiidhka ka dhexeeya Maamulka Muqdisho ee Soomaaliya joogto ahaanayn, isbeddellada siyaasadeed ee gobolka ka socdaana ku riixayaan inay xidhiidh rasmiya la samaysato Somaliland oo dunidu ku baraarugtay ahmiyadda goobta ay kaga taallo gobolka Geeska Afrika.
Pakistan ayaa muddo dheer ahayd xulafada Soomaaliya ee qaaradda Aasiya, balse hadalladan cusub waxay muujinayaan in jihadaas laga yaabo inay is beddesho, iyadoo Somaliland ay sii kordhayso saamaynteeda siyaasadeed iyo tan istaraatiijiyadeed ee gobolka.
