Hargeysa (SLpost) – Guddida Tacliinta Sare ee Jamhuuriyadda Somaliland ayaa maanta si rasmi ah u go’aamiyey in albaabada la isugu dhufto Jaamacadda Rift Valley faraceeda magaalada Berbera, kadib markii la sheegay in jaamacaddu ku guul-darraysatay inay buuxiso halbeegyada iyo shuruudaha looga baahan yahay jaamacadaha dalka.
War-saxaafadeed uu ku saxeexan yahay Guddoomiyaha Guddida Tacliinta Sare, Prof. Xasan Cumar Halas, kuna taariikhaysan 23-ka July 2026, ayaa lagu sheegay in go’aankani ka dhashay kormeer iyo qiimayn ay guddidu ku samaysay jaamacadda intii u dhaxaysay 14-kii ilaa 16-kii July 2026.
Sida lagu sheegay war-saxaafadeedka, guddidu waxay baadhitaanka ku ogaatay in Jaamacadda Rift Valley, faraceeda Berbera ay dib u bilowday shaqada iyadoo aan haysan oggolaansho rasmi ah oo ka yimi Guddida Tacliinta Sare. Waxa kale oo lagu sheegay inaanay jaamacaddu buuxin 16-ka halbeeg ee ugu yar (Minimum Standards) ee lagu maamulo tayada tacliinta sare ee Somaliland.
Warbixintu waxay intaa ku dartay in jaamacaddu aanay lahayn adeegyo muhiim ah oo ay ka mid yihiin maktabad ku filan iyo agab waxbarasho oo waafaqsan heerarka qaranka. Sidoo kale, guddidu waxay sheegtay in maamulka jaamacaddu aanu fulin sixitaanno iyo awaamiir hore oo loo soo jeediyey si loo waafajiyo shuruucda dalka.
Guddida Tacliinta Sare waxay sidoo kale ku eedaysay jaamacadda inay qabatay hawlo tacliinka la xidhiidha, oo ay ka mid yihiin Thesis Defense Proposal, iyadoo aan la buuxin shuruudihii sharci iyo nidaam ee looga baahnaa hay’adaha tacliinta sare.
Go’aanka guddidu wuxuu dhigaya in laga bilaabo maanta oo ay taariikhdu tahay 23-ka July 2026 la joojiyo dhammaan hawlaha Jaamacadda Rift Valley ee Berbera, isla markaana aan la diiwaangelin karin arday cusub.
Dhanka kale, Guddida Tacliinta Sare ayaa sheegtay in la diyaarin doono hannaan lagu wareejinayo ardayda wax ka baranaysay jaamacadda jaamacadaha kale ee ku yaalla magaalada Berbera, si aanay waxbarashadoodu u hakad gelin.
War-saxaafadeedka ayaa lagu xusay in tallaabadan lagu saleeyey qodobbada Dastuurka Jamhuuriyadda Somaliland, Xeerka Waxbarashada Qaranka iyo xeerarka u dejisan nidaaminta iyo ilaalinta tayada tacliinta sare.
Guddida Tacliinta Sare waxay ugu dambayn ku gooddiyeen inay sii wadi doonaan kormeerka iyo qiimaynta jaamacadaha dalka, isla markaana tallaabo sharci laga qaadi doono hay’ad kasta oo ku guul-darraysata inay u hoggaansanto shuruudaha iyo halbeegyada lagu xaqiijinayo tayada waxbarashada sare ee dalka.
Reporting by Somalilandpost News
