Hargeysa (SLpost)- Carruurta ku nool deegaannada Koonfurta, Galbeedka iyo Waqooyiga Hargeysa ayaa sanadihii u dambeeyay wajahaya caqabado dhanka waxbarashada ah, kaddib markii ay xidhmeen qaar ka mid ah dugsiyadii ka jiray deegaannadaas, halka dugsiyo kale ay la tacaalayaan duruufo sababi kara in adeeggooda waxbarasho uu sii wiiqmo.
Xiritaanka dugsiyada ayaa si gaar ah u saameeyay qoysaska danyarta ah ee ku nool tuulooyinka iyo deegaannada ka baxsan magaalada Hargeysa, kuwaas oo aan awoodin inay carruurtooda u diraan dugsiyo ku yaalla masaafo dheer ama ay bixiyaan kharashaadka gaadiidka iyo waxbarashada gaarka loo leeyahay.
Dugsiga Maraaga oo xidhmay
Dugsiyada xidhmay waxaa ka mid ah Dugsiga Maraaga, oo ka tirsan degmada Faraweyne, kaas oo ay wax ka baran jireen boqollaal arday.
Xiritaanka dugsiga ayaa qoysaska deegaanka ku keentay xaalad adag, maadaama carruur badan ay waayeen goob waxbarasho oo u dhow deegaanka ay ku nool yihiin.
Waalidiinta iyo dadka deegaanka ayaa walaac ka muujinaya in haddii aan xal degdeg ah loo helin xaaladda dugsiga, ay carruur badan muddo dheer ka maqnaan karaan waxbarashada.
Boodhin ku yaalla Sheekh Mooldhe oo isna xidhmay
Sidoo kale, dugsi weyn oo boodhin ah oo ku yaalla deegaanka Sheekh Mooldhe ayaa gebi ahaanba xidhmay.
Dugsigan ayaa la sheegay in xukuumaddii hore ay dhistay, balse kaddib markii aan loo helin miisaaniyad joogto ah oo ka timaadda miisaaniyadda qaranka iyo cid kale oo taageerta, uu ugu dambayn albaabada u laabay ardaydii wax ka baran jirtay.
Xiritaanka dugsiga boodhiniga ah ayaa si gaar ah u saameyn kara carruurta ka imanaysa deegaannada fogfog, kuwaas oo dugsiga u baahnaa maadaama masaafada iyo duruufaha nololeed ay ka hor istaagi karaan inay maalin kasta u safraan xarumaha waxbarashada.
Dugsiyo kale oo wajahaya duruufo adag
Dhibaatadu kuma koobna labada dugsi ee Maraaga iyo Sheekh Mooldhe.
Dugsiyo kale oo ku yaalla tuulooyinka ku teedsan Waqooyiga, Galbeedka iyo Koonfurta Hargeysa ayaa la sheegay inay wajahaan duruufo la mid ah kuwa sababay xiritaanka dugsiyada qaarkood.
Dhibaatooyinka ugu waaweyn ee la tilmaamayo waxaa ka mid ah macallimiin yari, fasallo aan ku filnayn tirada ardayda, agab waxbarasho oo kooban iyo dhaqaale la’aan.
Arrimahan ayaa halis gelin kara sii socoshada waxbarashada carruurta ku nool deegaannada miyiga iyo kuwa ku dhow magaalada Hargeysa.
Qoysaska danyarta ah oo u baahan gurmad
Dhibaatada waxbarashada ayaa sidoo kale si dhow ugu xidhan xaaladda nololeed ee qoysaska deegaanka.
Qoysas badan oo danyar ah ayaa la sheegay inay ku adagtahay inay carruurtooda helaan cunto ku filan, taas oo iyaduna saameyn ku yeelanaysa awoodda carruurta ay ku sii wadan karaan waxbarashada.
Dadka deegaanka ayaa ku baaqaya in wax laga qabto labada dhinac ee dhibaatada: helitaanka waxbarasho iyo taageerada qoysaska nugul.
Waxay ku doodaan in ilmaha aan haysan cunto ku filan iyo adeegyo aasaasi ah ay adkaan karto inuu si joogto ah uga qayb galo waxbarashada.
Masuuliyiinta deegaanka oo laga dalbanayo inay wax ka qabtaan
Dadka deegaanka ayaa sidoo kale walaac ka muujiyay doorka masuuliyiinta ka soo jeeda deegaanadaas, iyagoo sheegaya inaanay ilaa hadda muuqan tallaabo ku filan oo wax looga qabanayo xaaladda dugsiyada iyo baahiyaha bulshada.
Si kastaba ha ahaatee, waxaa socda kulamo ay dadka deegaanka iyo waxgaradku kaga arrinsanayaan xaaladda, iyagoo doonaya in baahiyaha jira loo gudbiyo masuuliyiinta ay khusayso iyo Xukuumadda Somaliland.
Kulamadaas ayaa lagu doonayaa in si rasmi ah loogu soo bandhigo baahiyaha waxbarasho ee deegaanka, gaar ahaan dib u furista dugsiyada xidhmay, helitaanka macallimiin, kordhinta fasallada iyo taageerada qoysaska danyarta ah.
Baaq ku socda Xukuumadda
Dadka deegaanka ayaa Xukuumadda Somaliland ugu baaqaya inay si degdeg ah u qiimeyso xaaladda waxbarasho ee ka jirta tuulooyinka ku teedsan Hargeysa, isla markaana ay xal waara u raadiso dugsiyada xidhmay iyo kuwa halista ugu jira inay xidhmaan.
Waxay sidoo kale dalbanayaan in deegaannada miyiga iyo kuwa ka baxsan magaalooyinka aan laga tegin marka la qorsheynayo adeegyada waxbarashada, maadaama carruurta ku nool deegaannadaas ay xaq u leeyihiin inay helaan waxbarasho tayo leh oo u dhow goobaha ay ku nool yihiin.
Xiritaanka dugsiyada iyo macallimiin la’aanta ayaa haddii aan wax laga qaban sababi kara in carruur badan ay ka maqnaadaan waxbarashada, taas oo mustaqbalka saamayn ku yeelan karta horumarka bulshada iyo deegaanka.
Dadka deegaanka ayaa hadda sugaya in kulamada socda ay ka soo baxaan qorshe cad oo lagu gaadhsiinayo cabashooyinkooda Xukuumadda Somaliland, isla markaana wax looga qabanayo dugsiyada xidhmay iyo baahiyaha kale ee waxbarasho.
