HARGEISA – Madaxweynaha Jamhuuriyadda Somaliland, Cabdiraxmaan Maxamed Cabdilaahi Cirro, ayaa khudbad dhinacyo badan taabanaysa ka jeediyey xuska sannad-guurada 35-aad ee kasoo wareegtay dib ula soo noqoshadii madax-bannaanida Somaliland oo maanta ku beegan.
Madaxweynuhu waxa uu ugu horrayn shacabka Somaliland ugu hambalyeeyey munaasibadda 18-ka May, isaga oo ku tilmaamay maalin astaan u ah halgan, midnimo, adkaysi iyo guul qaran.
Waxa uu sheegay in sannadkan xuska 18-ka May uu leeyahay miisaan taariikheed oo ka duwan sannadihii hore, maadaama ay Somaliland u dabbaal-degayso munaasibaddan iyada oo haysata aqoonsi caalami ah, taas oo uu ku tilmaamay guul kasoo baxday dadaal dheer oo ay shacabka iyo dawladdu wada-jir isaga kaashadeen.
Madaxweynaha Somaliland ayaa khudbaddiisa ku adkeeyey in qaranimada Somaliland tahay doorasho ay shacabka Somaliland si buuxda u yeesheen, isla markaana aanay ahayn arrin gorgortan geli karta ama laga noqon karo.
Waxa uu bulshada caalamka uga digay isku day kasta oo lagu doonayo in dib loogu celiyo nidaamyo ama dawladnimo aan waafaqsanayn xaqiiqada siyaasadeed iyo rabitaanka shacabka, isaga oo sheegay in waayo-aragnimadii hore ay dunida bartay in aan la isku qasbi karin bulshooyin iyo nidaamyo aan isqaadan karin.
Madaxweynuhu waxa uu ugu baaqay dalalka dunida inay qaataan casharrada ka muuqda gobolka Geeska Afrika, isla markaana ay taageeraan waddooyinka nabadda, dimuqraadiyadda iyo xaqa ay ummaduhu u leeyihiin inay ka tashadaan mustaqbalkooda.
Sidoo kale, waxa uu bogaadiyey shacabka Somaliland doorka ay ku leeyihiin ilaalinta nabadda, dimuqraadiyadda iyo dhismaha hay’adaha dawliga ah, isaga oo xusay in isku duubnida bulshada iyo adkaysiga shacabka ay saldhig u noqdeen guulaha maanta la gaadhay.
Madaxweynaha ayaa mahadnaq gaar ah u jeediyey ciidamada kala duwan ee Qaranka Somaliland, kuwaas oo uu ku ammaanay difaaca dalka, ilaalinta amniga iyo doorka ay ka qaataan adkaynta jiritaanka qaranka.
Khudbadda Madaxweynaha ayaa ugu dambayn xanbaarsanayd farriin ku wajahan mustaqbalka Somaliland, isaga oo sheegay in xukuumaddiisu sii wadi doonto xoojinta dawladnimada, horumarinta dhaqaalaha, ballaadhinta xidhiidhada dibadda iyo ilaalinta danaha qaranka.
Hadalka Madaxweynaha Somaliland ee munaasibadda 18-ka May ayaa noqday mid si weyn diiradda u saaray qaranimada, aqoonsiga caalamiga ah, xaqa aayo-ka-tashiga iyo farriimo uu u diray Soomaalida kale iyo Beesha caalamka.
SOURCE: Somalilandpost.news
