Qiimaha Shidaalka Somaliland oo kordhay 32% Saddex usbuuc gudahood
Qiimaha shidaalka ee Somaliland ayaa mar kale cirka isku shareeray, iyadoo arrintan ay abuurtay dood weyn, cadho bulsho iyo su’aalo la xidhiidha sida go’aamada xukuumaddu iyo shirkadaha shidaalku u saamaynayaan nolosha shacabka.
Korodhka Qiimaha iyo Sababaha Horseeday
Muddooyinkii u dambeeyey, qiimaha shidaalka dunida ayaa kor u kacay iyadoo ay door ku leeyihiin Xiisadda ka aloosan Bariga Dhexe, Saameynta wadamada soo saara shidaalka oo dagaalka qayb ka ah iyo Khalkhal ku yimid marin-biyoodka Hormuz oo ay maraan boqolkiiba 20 gaadiidka badda ee Shidaalka ka qaada dalalka Khaliijka.
Saamayntan ayaa soo gaadhay Somaliland oo litirka shidaalku gaadhay 11,500 shilin oo u dhiganta ($1.1) taas oo culays weyn ku noqotay gaadiidleyda iyo adeegyada kale ee bulshada.
Wareegtadii Wasaaradda Ganacsiga iyo Diidmada Shirkadaha
Iyadoo la eegayo culayska sii kordhaya, Wasaaradda Ganacsiga Somaliland waxay soo saartay wareegto ay ku farayso shirkadaha shidaalka soo dejiya in ay Qiimaha litirka shidaalka laga dhigo 9,000 shilin
Si kastaba ha ahaatee, Ganacsatada shidaalka ayaa ka dhego-adeygay go’aankan, iyagoo sii watay iibinta qiimihii hore oo 2,500SHsl ka badan go’aanka wareegtadii ka soo baxday Wasaaradda Ganacsiga.
Tani waxay sababta inay shacabka Somaliland su’aalo iska weydiiyaan Awoodda fulineed ee Xukuumadda, Xidhiidhka ganacsi ee u dhexeeya shirkadaha shidaalka iyo xukuumadda Iyo in shirkaduhu ay leeyihiin ku-tagri-falka awoodda iyo jaan-goynta qiimaha badeedaha.
Shirkii Xukuumadda iyo Shirkadaha Shidaalka
Maanta ayaa lagu qabtay Hargeysa shir lagu falanqeeyey arrinta sicir-kaca ee shidaalka, waxaana isugu yimid Masuuliyiinta xukuumadda iyo Shirakadaha shidaalka soo dejiya. Shirkan oo socday muddo saacado ah, waxay labada dhinac ku heshiiyeen in qiimaha litirkii shidaalka la gaadhsiiyo 12,500 shilin, taas oo boqolkiiba 32 Ka badan qiimihii xukuumaddu soo jeedisay (9,000 shilin), boqolkiiba 8-na ka badan qiimihii shirkaduhu hore u iibinayeen toddobaadyadii u dambeeyey oo ahaa 11,500 shilin.
Horaantii bishan March, 2025 qiimaha litirka Shidaalka ah oo magaalada Hargeysa ka marayey 8,500SH/sl, waxa uu qiimaha cusub ee maanta la jaan-gooyey (12,500) ka dhigayaa inuu ka badan yahay boqolkiiba 32 muddo saddex toddobaad ah gudahooda.
Fajaca Bulshada iyo Dareennada ku dhashay
Go’aanka cusub wuxuu dadka shacabka ah ku noqday amakaag iyo fajac, iyadoo dad badan ku tilmaameen In dawladda ay u muuqato mid ku guuldarreysatay ilaalinta danaha Bulshada, In shirkadaha shidaalku ay heleen go’aan iyaga danaynayna iyo in layska indho-tiray hoos-u-dhaca ku yimi qiimaha shidaalka ee Caalamka.
Shacabka Somaliland ayaa Baraha bulshada ku faafiyey aragtiyahooda la xidhiidha go’aankan, iyadoo dadku isweydiinayeen:-
- Maxaa xukuumadda ku qasbay inay ogolaato qiime ka sarreeya kii ay iyadu hore u Jaan-goysay?
- Maxay tahay awoodda ay shirkaduhu ku diideen wareegtadii Wasaaraddu soo saartay maalmo ka hor?
- Maxaa la iskaga indho-tiray qiimaha Shidaalka ee Suuqa caalamka oo hoos u dhacay?
Saamaynta Dhaqaale iyo Werwerka Shacabka
Korodhkan cusub ee qiimaha shidaalka wuxuu ku yeelan doonaa bulshada saameyn ballaadhan oo taabanaysa dhinacyada Korodh ku yimaadda qiimaha gaadiidka dadweynaha, qiimo-barar ku yimaadda badeecadaha daruuriga ah, taas oo sababi karta kacdoon shacab.
Dhinaca kale, qaar ka mid ah falanqeeyayaasha dhaqaalaha ayaa sheegaya in haddii xukuumaddu ku adkaysan lahayd qiimaha 9,000 ee hor u jaan-goysay ay dalka ka dhacdo shidaal la’aan maadaama oo soo-dejinta shidaalka gacanta ugu jiro Shirkadaha.
Gebo-gabadii, Arrinta qiimaha shidaalka waxay mar kale dib u iftiimisay awoodda xukuumaddu u leedahay xakamaynta Qiimaha suuqyada muhiimka ah, Saamaynta shirkadaha gaarka loo leeyahay ku leeyihiin nolosha dadka, Baahida loo qabo sharci dejin xooggan oo nidaamisa soo dejinta shidaalka Iyo werwerka shacabka ee ku saabsan Awoodda jaan-goynta masiirka nolosha Bulshada ee gacanta ugu jirta Ganacsatada.
Hargeysa/Somaliland
Somalilandpost.news
