HARGEYSA (SLpost)- Xubno ka tirsan Golaha Wasiirrada Somaliland ayaa kormeer indho-indhayn ah ku tagay xarunta warshadda Boodhari Mills oo ku taalla duleedka Hargeysa, qiyaastii 10km dhanka galbeed kaga beegan magaalada.
Warshaddan oo ka mid ah mashaariicda Ugu Muhiim san wax-soo-saarka dalka, ayaa soo saarta daqiiqda iyo calafka xoolaha, iyada oo door muuqda ka qaadanaysa horumarinta dhaqaalaha iyo sugnaanta cuntada.
Kormeerkan waxaa ka qayb galay wasiirro ay ka mid yihiin Wasiirka Qorshaynta Marwo Kaltuun Sheekh Xasan, Wasiirka Biyaha Maxamed Cabdimaalik, iyo Wasiirka Maalgashiga iyo Warshadaha Siciid Maxamed Buraale, sidoo kale waxa goob joog ka ahaa Guddoomiyaha Ururka Hoodaale Maxamuud Qaliib iyo ganacsato kale.
Ujeeddada kormeerkan ayaa ahayd xoojinta iyo dardargelinta maalgashiga gudaha, gaar ahaan warshadaha wax-soo-saarka ee muhiimka u ah kobaca dhaqaalaha dalka.
Guddoomiyaha Warshadda Boodhari Mills, Cabdiraxmaan Sheekh Axmed Nuur, ayaa masuuliyiinta si faahfaahsan uga warbixiyey habsami u socodka shaqada warshadda, heerarka wax-soo-saarka, iyo qorshayaasha horumarineed ee mustaqbalka. Iyo Saamiga gabagabada ama dhamaadka ah, ee warshaddu so bandhigtay si ay u gaadho baaxad sare xaga soo saarka maciishada daqiiqda. Oo Somaalidu ku kharashgarayso in ka badan $360 million oo dollar sanad walba.
Guddoomiyaha Ururka Hoodaale, Maxamuud Qaalib, ayaa si gaar ah u ammaanay saamilayda warshadda, isaga oo ku tilmaamay maalgashigooda mid tusaale u ah ganacsatada kale ee doonaya inay dalka ku horumariyaan warshado wax-soo-saar leh.
Dhanka kale, Wasiirrada Biyaha iyo Qorshaynta ayaa si qoto dheer uga hadlay muhiimadda maalgashigu u leeyahay kobaca dhaqaalaha, abuurista shaqooyin, iyo yareynta ku tiirsanaanta badeecadaha dibadda laga keeno. Waxay sidoo kale tilmaameen in warshadaha noocan ahi ay laf-dhabar u yihiin horumarka dalka.
Gabagabadii, Wasiirka Maalgashiga Siciid Maxamed Buraale oo soo xidhay kormeerka ayaa sheegay in xukuumaddu si buuxda u garab taagan tahay cid kasta oo doonaysa inay dalka maalgashi ka samayso. Wuxuu ku ammaanay Warshadda Boodhari Mills kaalinta ay ka qaadanayso wax-soo-saarka gudaha iyo inay tusaale u tahay maalgashi guuleystay.
Intii uu socday kormeerku, wasiirradu waxay soo mareen qaybaha kala duwan ee warshadda, iyaga oo si dhow u indha-indheeyey hababka wax-soo-saarka iyo tayada badeecadaha,Booqashadooda waxay dhiiri galin u tahay wax soo saarka Warshada iyo saamilayda samaysay Maalgashiga Warshada Daqiiqda Iyo Calafka Xoolaha Ee Boodhari Mills
Somalilandpost.news
Hargeysa/Somaliland
