Hargeysa (SL.Post) Gudoomiye ku xigeenka koowaad ee xisbiga mucaaridka ah eeWADDANI Axmed Muumin Seed ayaa shaaca ka qaaday inuu ka mid yahay musharaxiinta ku tartamaysa jagada madaxweyne ku xigeen ee xisbiga Waddani.
Axmed Muumin Seed oo waraysi gaar ah siiyey wargeyska Geeska Afrika ayaa sidoo kale ka hadlay saamaynta ay isku yeelanayaan musharaxiinta kale ee deegaankiisa ah kuwaas oo kula tartami doona jagadaasi.
Axmed Muumin Seed oo ugu horayn ka hadlaya shirka golaha dhexe ee xisbiga Waddani ayaa waxa uu yidhi “Shirka golaha dhexe ee xisbiga Waddani mudo badan ayey sugayeen taageerayaasha xisbiga Wadani ee gudaha iyo dibada iyo dadka reer soomaalilandba u dhag taagayeen goorma ayaa la qaban doonaa, arinkaasina waxa uu mid hawshiisa iyo culayskiisa leh laakiin waanu ku dhawaaqnay wakhtiga aanu qaban doono, waxaana haatan inaga xiga mudo laba bilood ah, labadaas biloodna ay socoto diwaan gelinta Laascaanood, markaa waxaanu ku rajo weynahay inuu si wanaagsan oo dimuqraadi noogu dhaco.”
Sidoo kale waxa uu sheegay inuu kalsoono ku qabo in shirka golaha dhexe ee xisbiga Waddani u dhici doono si dimuqraadi ah “Runtii waxaanu boqolkiiba boqol kalsooni badan ku qabnaa in banaan tartanku ka dhici doono oo dimuqraadiyadi ka dhici doonto waayo waxa aynu dadka u sheegayno waa inaynu ka dhabaynaa markaa si dimuqraadi ah oo xor iyo xalaal ah ayaanu rajaynaynaa inuu shirkaasi noogu qabsoomi, ilaa hada ma hayo cid aan maqlay oo la tartamaysa gudoomiyaha laakiin waa laga yaabaa inay cid damac leh timaado oo la tartanto.”
Gudoomiye ku xigeenka Waddani Axmed Muumin Seed waxa uu cadeeyey inuu u sharaxan yahay jagada musharaxa madaxweyne ku xigeen ee xisbigaasi waxaanu yidhi “Halka aan u socday halkaas ayey ahayd, taasina waa war laga dharagsan yahay wixii aynu xisbiyada u samaysanay waxay ahayd inaanu talada dalka wax ku yeelano oo ka mid noqono, anigana hankaygu kolay musharaxiinta xisbiga u tartamaya waan ka mid ahay, Cabdirashiidna waa nin aanu isku deegaan nahay oo isku hayb nahay oo aanu gobol ka soo wada jeedno isaguna wuu ku dhawaaqay musharaxnimadiisa aadna waan u soo dhawaynayaa, musharaxiin kalana runtii way jiraan oo iyaguna tartamaya waana xisbi oo tartanku wuu iman doonaa waanan soo dhawaynaynaa cidii doonaysa inay kursiga nagula tartanto waxaana na kala saari doona shirka golaha dhexe.”
Axmed Muumin Seed waxa uu ka hadlay saamaynta ay isku yeelan doonaan musharaxiinta ku tartamaysa shirka golaha dhexe ee xisbiga Waddani ee ay isku deegaanka ka soo wada jeedaan waxaanu yidhi “Anigu gudoomiye ku xigeenka koowaad ee xisbiga ayaan ahay mudo badana xisbiga waan ka soo shaqaynayey, nimanka saaxiibaday ah ee ila tartamaya ee Maxamed Cali iyo Cabdirashiid runtii wax culays ah oo dhibaato ah oo ay igu hayaan ma jirto , dimuqraadiyada iyo asxaabta ayaana keenaysa inay dadku tartamaan waxaanan is leeyahay waa dhaqan somaliland oo dhan ka jira in dadku tartamaan oo kuraasta hungureeyaan, markaa waan dareemayaa in damaca iyo hanka aan anigu leeyahay ay walaalahayna leeyihiin, ragaas aanu saaxiibka nahay ee aanu isku xisbiga iyo isku gobolka ka soo wada jeedno kulama yaabayo inay yidhaahdaan musharaxiin ayaanu nahay laakiin aad aayaan u soo dhawaynayaa labadaba, waxaana na kala saari doona golaha dhexe.” Ayuu yidhi Axmed Muumin Seed.
Somalilandpost Hargeysa .
