Hargeysa (SLpost)- Xisbiyada Waddani, Kulmiye iyo KAAH ayaa bayaan wadajir ah oo maanta soo baxay kaga digay in awoodda Xukuumadda Somaliland loo adeegsado cabudhinta saxaafadda iyo ku-xadgudubka xuquuqda xorriyadda hadalka ee Dastuurku u jideeyey muwaadiniinta.
Bayaanka waxaa si wadajir ah u saxeexay Xildhibaan Ciise Keyd Maxamuud, oo Xisbiga talada dalka haya ee Waddani ku metela Golaha Wakiillada; Xildhibaan Maxamed Xuseen Jaamac (Rambo) oo Xisbiga Kulmiye uga jira Golaha Wakiillada; iyo Hoggaamiyaha Xisbiga KAAH, Cabdikariin Maxamed X. Cali.
Masuuliyiintan ayaa bayaankooda kaga hadlay xadhigga Abwaan Ismaaciil Jiheeye iyo Wariye Cabdiqani Xuseen Abokor (Baylood), kuwaas oo muddo laba toddobaad ka badan ku xidhan Xabsiga Dhexe ee Hargeysa.
Wariye Cabdiqani Baylood ayaa hore waraysi ula yeeshay Abwaan Ismaaciil Jiheeye, kaas oo waraysiga kaga hadlay cabasho uu sheegay inuu qabo, isla markaana uu Madaxweynaha Somaliland, Cabdiraxmaan Maxamed Cabdillaahi (Cirro), ku eedeeyey inuu xoog kaga qaaday dhul uu leeyahay oo ku yaalla agagaarka hoyga uu Madaxweynuhu ka deggan yahay magaalada Hargeysa.
Bayaanka wadajirka ah ayaa lagu sheegay in Abwaan Jiheeye uu xaq u lahaa inuu cabashadiisa si fagaare ah u soo bandhigo, halka Wariye Bayloodna uu gudanayey waajibaadkiisa saxaafadeed ee ah inuu bulshada gaadhsiiyo cabashooyinka iyo aragtiyada muwaadiniinta.
Saddexda masuul ayaa si gaar ah uga digay in awoodda dawladda loo adeegsado aamusinta muwaadiniinta cabanaya iyo saxaafadda tebisa cabashooyinkooda, iyaga oo xusay in haddii uu jiro muran dhul ama arrin kale oo madani ahi, ay jiraan hay’ado iyo maxkamado sharci ahaan loogu talagalay inay go’aan ka gaadhaan.
“Waxaan si gaar ah uga walaacsanahay in awoodda dawladdu u muuqato mid loo adeegsanayo aamusinta muwaadiniinta cabanaya iyo saxaafadda tebisa cabashadooda,” sidaas ayaa lagu yidhi bayaanka.
Waxay sidoo kale ku baaqeen in haddii labada qof loo hayo eed dembiyeed oo cad, si waafaqsan sharciga loo horkeeno maxkamad awood u leh, halka haddii aanay jirin eed sharci ahna ay tahay in xorriyaddooda dib loogu soo celiyo.
Masuuliyiintu waxay Xukuumadda ugu baaqeen inay ilaaliso xorriyadda hadalka iyo madaxbannaanida saxaafadda, iyaga oo ku adkeeyey in khilaafaadka iyo cabashooyinka muwaadiniinta lagu xalliyo sharciga, maxkamadaha iyo hay’adaha dastuuriga ah, ee aan lagu adeegsan awoodda ciidanka iyo xabsiga.
“Somaliland waxay muddo dheer ku faanaysay dimuqraadiyad, xorriyadda hadalka iyo saxaafad madaxbannaan. Ma aqbali karno in wixii aynu soddon sannadood dhisaynay lagu dhaawaco xadhigga abwaan, saxafi ama muwaadin hadalkiisa loo arko mid aan xukuumadda raalli gelinayn,” ayay masuuliyiintu ku yidhaahdeen qoraalkooda.
Waxa kale oo ay intaas ku dareen oo bayaankooda ku yidhaahdeen; “Waxaan Madaxweynaha iyo xukuumaddiisa xusuusinaynaa in awoodda dawladdu tahay amaanada shacabka, ee aanay ahayn awood loo adeegsan karo qof kasta oo dhaliila, cabta ama su’aal adag weydiiya masuuliyiinta.”
Bayaanka ayaa lagu soo gabagabeeyey in xorriyadda hadalku aanay ahayn deeq ay xukuumaddu bixiso, balse ay tahay xuquuq Dastuurku muwaadiniinta Somaliland siinayo.
Wararka Somaliladpost News
