Hargeysa (SLpost)- Maamulka Dugsiyada Nuuradiin, ayaa maanta xaflad ballaadhan oo abaalmarinno qaali ah lagu guddoonsiiyey u qabtay 10-kii Arday ee ugu sarreeyey dugsiyada Nuuradiin oo kaalmaha hore ka galay Imtixaankii shahaadiga ahaa ee Dugsiyada Dhexe iyo Sare ee dalka.
Munaasibadda oo ku qabsoontay Xarunta Dugsiga Sare ee Hablaha ee Nuuradiin, waxa ka qayb-galay Guddoomiyaha Xisbiga Mucaaradka ah ee UCID Eng Faysal Cali Waraabe, Hoggaamiyaha Xisbiga Waddani Xirsi Cali Xaaji Xasan, Aqoonyahan, Abwaanno, Maamulka Sare iyo Ardayda Dugsiyada Nuuradiin, Waalidiin iyo Marti-sharaf kale.
Ugu horeyn waxa munaasibadda ka hadlay Maamulaha Guud ee Dugsiyada Nuuradiin Xaaji Mahad Ibraahim Maxamed oo sharraxaad ka bixiyey marxaladihii uu soo maray dugsiyada Nuuradiin iyo dedaallada ay maamul ahaan iyo dugsi ahaan u soo galeen in dugsigu ka mid noqdo Xarumaha Waxbarasho ee ugu wanaagsan dalka oo dugsigu maanta kaalin muhiim ah kaga jiro.
FAAHFAAHINTA WARKAN KAGA BOGO MUUQAALKA HOOSE
Hoggaamiyaha Xisbiga Mucaardka ah ee WADDANi, Xirsi Cali Xaaji Xasan oo hadal kooban ka jeediyay munaasibada, ayaa sheegay in 24 sannadood ka hor Mahad Nuuradiin uu ku bilaabay qol yar, isla markaana uu dedaal badan iyo juhdi geliyay dalkiisa, waana ku hanbalyaynayaa ayuu yidhi, Xirsi oo xusay inay xilligaa saaxiib ahaayeen Nuuradiin, maantana uu ku faraxsanyahay guusha uu gaadhay.
Guddoomiyaha Xisbiga UCID, Eng. Faysal Cali Waraabe, ayaa yidhi, “waxan soo taagnaa Nuuradiin oo Habluhu Daasadaha Caanaha ku fadhiyaan, markii danbena waxan arkay iyagoo kuraas ku fadhiya, maantana Illaahay mahadii.”ayuu yidhi, Faysal.
Sidoo kale, waxa madasha abaalmarinta lagu guddoonsiinayay 10-ka Arday ee ugu sareeyay Dugsiyada Nuuradiin Sheekh Maxamed Ismaaciil oo amaanay akhlaaqiyaadka iyo asturraanta Hablaha Nuuradiin, wuxuuna ku hanbalyeeyay Ardaydii ku guulaysatay abaalmarinta.
Dr: Xuseen Cabdilaahi Bulxan oo sidoo kale ka hadlay munaasibadaa, ayaa amaanay dedaalka dugsiyada Nuurdiin iyo doorka ay kaga jiraan waxbarashada dalka iyo horrumarinta tacliinta, wuxuuna hanbalyeeyay Ardayda kaalmaha hore lagu abaalmariyay ee Dugsiyada Nuuradiin.
Abwaan Xasan Dhuxul laabsaalax oo ka mid ahaa dadkii ka hadlay munaasidaa, ayaa ka sheekeeyay sida uu maamulaha Nuuradiin ugu wanaagsanyahay samafalka, wuxuuna sheegay inuu keligii 19 Arday oo danyar ah u keenay si ay waxbarasho bilaash ah u helaan, isagoo sheegay inuu ka aqbalay Nuuradiin oo Ardaydaasi maanta ka mid yihiin kuwa halkan fadhiya.
SOMALILANDPOST
