NAIROBI (SLpost) — Abwaan Yuusuf Cismaan Cabdulle (Yuusuf Shaacir), oo ka mid ah haldoorka suugaanta Somaliland, isla markaana muddo dheer ka shaqaynayey kaydinta dhaqanka iyo suugaanta Soomaalida, ayaa abaalmarin lagu guddoonsiiyey magaalada Nairobi ee dalka Kenya.
Munaasibadda lagu maamuusay abwaanka ayaa lagu qabtay Hotel Panafric ee Nairobi, waxaana si wadajir ah u soo qabanqaabiyey hay’adaha IIDA, MRG iyo Midowga Yurub. Munaasibadda ayaa lagu daahfurayey warbixin sannadeed laga diyaariyey xaaladda iyo waayaha bulshooyinka laga tirada badan yahay ee Soomaalida.
Waxaa munaasibadda ka qaybgalay wakiillo ka socday hay’ado caalami ah iyo marti sharaf kale, oo ay ka mid ahaayeen Safiirka Midowga Yurub u qaabilsan Soomaaliya, Michele Cervone d’Urso.
Abwaan Yuusuf Shaacir oo ka mid ahaa shakhsiyaadkii lagu martiqaaday munaasibadda ayaa halkaas ka jeediyey gabay uu hore u tiriyey oo la yidhaahdo “Dulmanaha La Quudhsaday”, kaas oo uu kaga hadlay xaaladda bulshada laga tirada badan yahay iyo meeqaamka ay ku dhex leeyihiin bulshada Soomaaliyeed.
Gabayga ayaa loo tarjumay luuqadda Ingiriisiga, waxaana nuqullo ka mid ah loo qaybiyey dadkii ka qaybgalay munaasibadda, si ay uga bogtaan farriinta uu xambaarsan yahay.
Dhammaadkii munaasibadda, Abwaan Yuusuf Shaacir ayaa lagu guddoonsiiyey abaalmarin ay ku xardhanaayeen astaamaha Midowga Yurub iyo hay’adaha IIDA iyo MRG. Abaalmarinta ayaa lagu maamuusay kaalinta uu suugaantiisa kaga qaatay u-doodista iyo difaaca xuquuqda dadka laga tirada badan yahay.
Munaasibadda waxaa sidoo kale goob-joog ka ahaa La-taliyaha Madaxweynaha Somaliland ee Arrimaha Bulshada Laga Tirada Badan Yahay, Barkhad Jaamac Xirsi, oo lagu martiqaaday madasha.
Barkhad Jaamac Xirsi ayaa muujiyey sida uu ugu faraxsan yahay abaalmarinta la guddoonsiiyey abwaanka, isaga oo sidoo kale ka markhaati kacay doorka Yuusuf Shaacir uu ka qaatay u-doodista dadka la hayb-sooco iyo gudbinta fariimaha bulshada iyada oo loo marayo suugaanta.
