Hargeysa (SLpost)- Maalintii lagu dhawaaqay gooni-isu-taagga iyo dib ula soo noqoshada madax-bannaanida Somaliland 18-kii May 1991-kii oo sannadkasta si weyn looga xusi jiray dalka iyo waddamada dibedda ee ay Dadka reer Somaliland ku nool yihiin, ayaa 18-ka may ee sannadkan 2020-ka oo ku buuxda 29-guurada Madax-bannaanida qarankan.
Hase-yeeshee, 18 May 2020 xaaladdu way ka duwanayd amma ka beddelnayd sidii hore, Sadhada Covid19 ee Dunida saameeyey awgii, taas oo Dadku bedi guryohooda ku dabbaal-degayeen, Madaxweynaha Somaliland-na Khudbad toos ah oo uu Warbaahinta mariyey kula hadlay Dadweynihiisa, Dowladda Soomaaliya iyo Caalamkaba.
Haddaba, Xarunta Dhaqanka ee Hargeysa, ayaa qabatay Barnaamij toos looga daawanayey Shabakadda Faysboog, kaas oo xus iyo baraarujinta sidii ay ku timi 18-ka May, isla markaana ay dood ku wadaajiyeen Khadka Faysboog xubno kala duwan oo ay ka mid ahaayeen Axmed Xasan Cali Casoowe oo hore xilal Wasiirnimo uga soo qabtay Somaliland, immikana ka mid ah hormuudka Jaamacadda Nugaal ee magaalada Laascaanood, Dr. Maxamuud Xasan Taani oo ka mid ahaa Xubnihii UFO ee bilaabay halgankii Dhagax-tuurka Hargeysa 1982-kii, Ruqiya Cali Faarax oo Guddoomiye ka ah mid ka mid ah Ururrada Reer Somaliland iyo Guddoomiyaha Xarunta Dhaqanka ee Hargeysa Dr. Jaamac Muuse Jaamac.
Barnaamijka oo uu daaddihinayay Agaasimaha Xarunta Dhaqanka ee Hargeysa Iid Xasan Aw Muuse, waxay Xubnaha ka qaybgalay kaga faalloodeen halgankii ay Somaliland u soo gashay xornimadii ay Ingiriiska ka qaadatay 26-kii June 1960-kii, siduu ku bilaabmay, sidii ay u ku timi midnimadii Somaliland iyo Soomaalidii Talyaaniga ka xoroowday 1-dii June isla 1960kii, wixii midnimada kaga lumay Somaliland, halgankii dambe ee la soo noqdashada madax-bannaanida ee Somaliland dagaal qadhaadh oo Ururkii SNM la galay Dowladdii Millateriga ahayd ee Soomaaliya ka dib, sidii 18-kii May 1991-kii oo Bur’o loogaga dhawaaqay gooni-isu-taagga Somaliland, iyadoo Isniinta 18-ka May 2020-ka 29 jirsatay, waxa u qabsoomay muddadaas, waxa ka dhiman, halka hadda la marayo iyo halka loo socdo.
Barnaamijkaas Dood-wadaagga ah ee 29—guuurada 18-ka May ee Somaliland ee ay Xarunta Dhaqanka Hargeysa sida Tooska ah ugu qabatay Khadka Faysboog, maaddaama oo aanay isu imasho jirin Xanuunka jira awgii, Dadka ka qaybqaadanayaana meelo kala duwan joogaan, sida uu oddoroskaas, dib-u-eegista taariikheed iyo geeddi-socod ee Somaliland iyo aragti wadaaggoodaba, waxaannu idiinku soo gudbinaynaa Muuqaalkan Hoose.
Somalilandpost.net
somalilandpost@live.com