Hargeysa (SLpost)- Wasiirkii hore ee Wasaaradda Horumarinta Maaliyadda Somaliland Yuusuf Maxamed Cabdi, ayaa isbarbar-dhig ku sameeyey Miisaaniyadaha dowladaha Somaliland iyo Soomaaliya.
Yuusuf Maxamed Cabdi waxa uu wax laga xumaado oo aan haboonayn ku tilmaamay in Dowladda Soomaaliya ku faanto qaadhaan-ururinta beesha caalamku ku taageerto dowladnimada oo boqolkiiba 75 uga timaadda Qaadhaan-bixiyeyaasha caalamka.
Wasiirkii hore ee Maaliyadda Somaliland wuxuu sheegay in miisaaniyadda rasmiga ah ee Soomaaliya tahay 250 Milyan halka in Miisaaniyadda Dowladda ee Somaliland oo gebi ahaanteeduba ku salaysan tahay cashuurta laga ururiyo Shacabka dhan tahay 430 Milyan Dollar.
Qoraal Kooban oo Yuusuf Maxamed Cabdi arrimahan kaga hadlay oo uu ku baahiyey ciwaanadihiisa baraha bulshada ayaa u qornaa sidan:- “Marka la eego dawlad ku sheegga Xamar fadhida ee Soomaaliya, miisaaniyad-cashuureedkeeda ay dakhli ahaan u soo urursato iyo odoraskeeduba waxay dhan tahay $250 Milyan oo Doolarka Maraykanka oo keliya.
Dhammaan 1 Bilyan ee ay ku faanayaan $750 milyan oo ka mid ah, waa kab-miisaaniyadeed (subsidiary Capital budget) oo ah miisaaniyad horumar oo lagu kabo oo uga timaada dalalka Qaadhaan-bixiyeyaasha ah ee taageera iyo hay’adaha Maaliyadda dunida sida Baanka Aduunka (the World Bank) iyo Sanduuqa Lacagta ee Adduunka (IMF).
Ma jiro waddan ku horumaray oo meel ku gaadhay aduunka, hab dhawrsato ama sadaqo ah oo si xor ah u qaatay go’aamadiisa masiiriga ah. Waxa keliya ee taas laga dhaxlaa waa faqri, isku tashi la’aan, liidnimo iyo jugjug meeshaada joog.
Sidaa darteed, dhawrto lacageed ama qaadhaan laguu yaboohay, inaad ku faanto, laga wanaagsan.
Bal aynu barbar-dhigno Miisaaniyad-sannadeedka Somaliland oo gebi ahaanteed ku salaysan cashuurt1a umaddeedu bixiso taasoo dhan 430 million USD.
Markaa, cid loo qaadhaamay, iyo cid iyadu isku tiirsan, cid kalena wax ka sugaynin, midkee faan leh?
Somaliland ha guulaysato.” Sidaas ayuu wasiirku ku sheegay qoraalkiisa.
