London (SLpost)- Musharraxa u taagan Jagada Madaxweynaha Xisbiga UCID Jamaal Cali Xuseen, ayaa sheegay in Musuqmaasuq iyo wax-is-daba-marin badheedh ay ku sifoobeen Masuuliyiin badan oo Xukuumadda Madaxweyne Siilaanyo ka tirsan, isla markaana dhaqaalaha la lunsado iyo dhaqaalaha sida qayrul-caadiga ah loo isticmaalaa uu dalka iyo dadka wax weyn u qaban lahaa
Jamaal Cali Xuseen oo hadal ka jeediyey munaasibad taageerayaasha Xisbiga UCID isaga iyo Guddoomiyaha iyo ku-xigeenka 3aad ugu sameeyeen magaalada London, waxa uu sheegay inay Xukuumaddu madaxweyne Siilaanyo bulshada culays ku saartay cashuuro mar walba la kordhiyo oo keenay sicir-barar iyo inay danyartu quutal-daruuriga iibsan kari waydo, waxaanu uu soo jeediyey inay Xukuumaddu wax ka qabato, isla markaana si cilmiyan ah u dejiso cashuuraha ay maalinba kordhinayso.
“Dawladaha dunida waad ogtihiine miyaad aragteen dawlad maalin walba leh maantana wadda heblaayo ayaannu dhagax-dhignay, meel heblaayo ayaannu dhagax-dhignay? Maya, waxay ka hadlaan koboca shaqaalaha iyo heerka shaqo la’aanta iyo sannadkiiba inta la shaqaalaysiiyo.”
Sidaa ayuu yidhi Jamaal Cali Xuseen. Waxaanu soo jeediyey in Shirkadaha heshiisyada Shidaalka ay Xukuumaddu la gelayso inay ka deyso qololka madow ee ay kula heshiinayso, isla markaana ay Baarlamaanka soo hordhigto heshiisyada caalamiga ah ee ay gelayso.
Jamaal Cali Xuseen oo ka hadlaya cashuuraha la kordhiyo waxa uu yidhi,“Intaasoo cashuurood ayaa afar illaa shan jeer la laban laabay, cashuuraha la laban laabayaa dhaqaale kordhis maaha, dadka dhaawac bay ku keenaan, sicir-barar bay ku keenaan, ee waxa loo baahan yahay in la cilmiyeeyo. Askarigu markuu kontonka dollar qaadanayey Gadbadda Bariiska ahi waxay ahayd 18 Doollar, maantana waad la socotaan, waxa la yidhi Mushaharkii baa laguu kordihyey, wuxu u goynayaana ma jiro.”
Jamaal Cali Xuseen waxa uu si qoto-dheer u taabtay gabbood-fallada dhinaca musuq-maasuq ee masuuliyiinta Xukuumadda Siilanayo ku kacaan, waxaanu yidhi, “Lacagta la musuqaya iyo ta Wasiirrada soo dhawayntooda iyo kharashkooda ku baxdaa markaan yareeyo Wasiirkiiba waa 15 kun oo Doollar, toban Wasiir marka la isu geeyo kharashka bishii ku baxaa waxay noqonaysaa 150,000 (boqol iyo konton) kun oo Doollar, marka aad xisaabiso waxay noqonaysaa ku dhawaad laba Milyan oo Doollar Ictiraafka innagoo kaga shaqayna oo dalka aqoonsi ugu donna ayaa la qaatay. Ictiraafka haddaan ka hadlo anigu waxaan rumaysanahay laabtuun baynu ka jeclaannay ee aad umaynaan doonin.”
Aqoonyahan Jamaal Cali Xuseen oo ka hadlayey qorsheyaasha xukuumaddu u dejisay siyaasadda Arrimaha Dibadda ee dalka, waxa uu sheegay inaanay Xukuumadda talada hadda haysaa ay meel fog ka raadinayso aqoonsiga, isla markaana waddamada Afrika oo aqoonsiga Somaliland ku xidhan yahay aanay aad isugu hawlin, waxaanu yidhi; “Afrika istaraatiji bay u baahan tahay, waynu samayn karaynaa innagoo dhawr waddan qorshe u samayna oo la kulanna oo Guddi u samayna, Somaliland intaas oo Guddi baa la sameeyey, wax walba Guddi baa loo sameeyey illaa Guddiga Xashiishka ayaa la sameeyey, Guddi Ictiraaf weli maynaan arag. Laakiin, ictiraafkii oo shaygii ugu muhiimsanaa ah Guddi looma samayn.”
Jamaal waxa uu ballan-qaaday inay UCID ahaan diyaar u yihiin inay Xukuumadda kala shaqeeyaan aqoonsi-raadinta iyo kobcinta iyo qorshaynta dhaqaalaha, hase-yeeshee, ay nasiib-darro tahay inay Xukuumaddu cadaw ka dhigato Xisbiyada Mucaaridka ah.
SOMALILANDPOTS.NET/Hargeysa