Tripoli (SLpost)- Hoggaamiyeyaasha mucaaradka Libya ayaa shaaca ka qaaday inay kalsooni ka qabaan qabashada Kornayl Qadaafi oo dhuumasho ku jira tan iyo intii uu ka baxsaday caasimadda Tripoli, sida uu sheegay wasiir ka tirsan golaha Ku-meel gaadhka ah, Ali Tarhouni.
Masuulkani waxa uu u sheegay saxafiyiinta, “Fikrad wanaagsan ayaanu ka haysanaa meesha uu ku sugan yahay. Wax shaki ahi nagagama jiro inaanu soo qaban doono.”
Farriintan mucaaradka ayaa ku soo beegantay war sir ah oo uu bixiyay mid ka mid ah ilaaladii gaarka ahayd ee Taliyaha Ciidadama oo ah Gaddaafi wiilkiisa Khamis kaas oo sheegay in hoggaamiyahan 69-jirka uu ka qaxay magaalada Tripoli wakhti magaalada Duqayn lagu waday maalintii Jimcaha waxaanu magaalada kaga baxay isaga oo la socda raxan baabuurta Qufulan ee shicibka.
Wiilkan da’da yar ee ilaalada ah ayaa shaaciyay inay u socdaaleen magaalada Sabha oo Qadaafi Qabiilkiisu deggen yahay isla markaana ku taala gobolada ka fog caasimadda ee Xagga Saxaaraha xuduudda Aljeeriya.
Magaalada Sabha ayaa ah meelaha ugu dambeeya ee dadkeedu daacadda u yihiin Qaddaafi kuwaas oo si xoog leh u hubaysan isla markaana u diyaar-garoobay inay difaacaan deegaankooda.
Wakhtigan Xaadirka ah, waxa go’doon ku jira askartii difaacaysay magaalada uu ka soo jeedo Qadaafi ee Sirte oo 400 mile dhinaca Woqooyi ka xigta magaalada qoyskiisu ka soo jeedo ee Sabha, waxaana shalay loo soo bandhigay inay is-dhiibaan ama la xasuuqayo.
Saraakiisha mucaaradka iyo NATO ayaa isku dayay inay xal-nabadeed ku dhammeeyaan go’doonka askarta ku sugan magaaladii ugu dambaysay ee ay xooga ku leeyihiin isla markaana la sugayo inta ay dhammaanaayaan maalmaha faraxadda ee Ciidal-Fidriga.
In kasta oo wakhtigaas loo qabtay jiro, haddana waxa magaalada ku hareeraysay kumanaan mucaaradka ah oo ku hubaysan Taangiyo, hubka waaweyn iyo baabuurta gaashaaman, in kasta oo magaalada ay ku sugan yihiin ciidamo si xoog leh u difaacaya.
Waxa la soo wariyay shalay in Gaddafi xaaskiisa Safiya iyo inantiisa Caasha oo inan umushay iyo laba ka mid ah wiilshiisa, Hanibal iyo Maxmed, ay u qaxeen dalka Aljeeriya. Waxa la sheegay inay ka mid ahaayeen 32 qof oo ka mid ah qoyska Qaddaafi oo magaalada Bani Walid kaga baxay iyaga oo wata Baabuurta Gaashaaman ay u baqooleen dhanka Koonfureed ee ilaa Sabha, dabadeedna ay dhanka Galbeed u raaceen xuduudka Aljeeriya.
Hoggaamiyayaasha mucaaradka kacsan ayaa dhaleeceeyay bixitaankooda in kasta oo Aljeeriya oo wakhti badan xulufo la ahayd Gaddaafi ay isku difaaceen inay magan-galyo siiyeen, waxaana la sheegayaa in xuduudka labada dal u dhexeeya shalay la xidhay.
Sida xaqiiqdu tahay, waxa haatan mucaaradka Liibya muhiimadda koowaad ah isla markaana ay aad u danaynayaan gacan-ku-dhigista magaalada Sirte oo 250 mile dhinaca bari ka xigta caasimadda. Hoggaamiyaha mucaaradka Mustafa Abdul Jalil ayaa sheegay inay ku dedaalayaan wada-xaajood ay la yeeshaan ciidamada ku sugan Sirte, balse dulqaadku dhammaan karo haddii la isku mari waayo.
Somalilandpost.net
somalilnadpost@yahoo.com