Hargeysa (SLpost)- Madaxweynaha Somaliland Md Axmed Siilaanyo, ayaa shacbiga Somaliland, gaar ahaan kuwa ku dhaqan deegaamadii uu safarka ku maray ku hambalyeeyey sida ay u qaabileen isaga iyo Weftiga Ballaadhan socdaalka 10-ka maalmood qaatay ku marayey gobollada dalka.
Madaxweynaha Somaliland iyo Wefti ballaadhan oo isugu jira Golihiisa Xukuumadda, Baarlamaanka (Guurti iyoWakiillo) iyo xubno ka tirsan Xisbiga Talada haya ee Kulmiye, ayaa socdaal laba todobaad qaatay ku galaa-bixiyey gobollada kala ah Gabiley, Awdal, Selal, Saaxil, Togdheer, Sanaag, Badhan iyo Saraar.
War-saxaafadeed caawa ka soo baxay xafiiska Afhayeenka Madaxtooyada oo lagu faafiyey hambalyada madaxweynaha, ayaa u dhignaa sidan:-
“Madaxweynaha Jamhuuriyada Somaliland Mudane, Axmed Maxamed (Silaanyo) isaga oo ku hadlaaya afkiisa Afka Qaranka Jamhuuriyada Somaliland iyo Afka Weftigii Qiimaha badnaa ee uu hogaaminaayey kuna wehelinaayey Safarkii dheeraa ee Mudada 10-ka Cisho qaatay ee la magac baxay Hillaacii Xeebaha Somaliland, waxa uu Hambalyo u dirayaa Dhamaan Bulshada reer Somaliland, meel ay joogaanba haddii ay noqon lahayd kuwa ku dhaqan Gobolada iyo Xeebaha uu madaxweynuhu soo maray iyo hadii ay noqon lahayd kuwa kala socday Warbaahinta ee ku dhaqan qaaradaha Aduunka iyo Dalkaba.
Hambalyada Madaxweynuhu u diraayo shacbiga ayaa ah mid la xidhiidha sidii diiranayd ee Gobol, Degmo, Tuulo iyo Miyiba loogu soo dhawaynaayey iyaga oo muujinaaya dareenkooda Muwaadin-nimo, Madaxweynahana ku hambalyeeyey go’aanka geesinimada leh ee uu ugu badheedhay safarka dheer ee uu ugu kuurgelaayey sidii uu xogolaal ugu noqon lahaa waxay ku sugan yihiin shacbiga uu hogaaminaayo meel ay joogaanba.
Madaxweynaha oo ku soo guryo noqday maanta Caasimada Somaliland ee Hargeysa oo uu 10-03-2014 uga baxay Galbeedka Somaliland 20.03.2014 kana uu ka soo galay Bariga Somaliland markii uu ka soo wareegay Xeebaha Somaliland, ayaa si gaara ugu mahadnaqayaa shacbiga sida wayn u soo dhaweeyey ee u taagnaa wadooyinka sidii ay madaxweynaha u soo dhawayn lahaayeen.
Ugu danbayna waxa uu Madaxweynuhu shacbiga Somaliland Illaahay uga baryayaa inuu ku simo bash-bash, barwaaqo, iyo Rayn-rayn inay ku gaadhaan kuna noolaadaan ilaashadaana nabadgelyada iyo xasilooninada Somaliland maanta ku naaloonayso una saamaxday in weftiga Madaxweynuhu si nabada ugu soo wareego meelo dalka intiisa badan ka mida.
Axmed Saleebaan Maxamed (Dhuxul)
Af-hayeenka Madaxtooyada JSL.