Wada hadal !!
(“Wada hadla” waa eray Afsoomaali ah,macnihiisuna waa cadyahay,laakiin qolaba sidii ay jeclayd ayuun bay u macnaysatay).
23 Feb 2012 waxaa London ka dhacay Shir ay ka soo qayb galeen ergooyin 50 ka badan ,isugna jira Dowlado iyo Ururo caalami ah .Shirkaa ujeedadiisu waxay ahayd amase lagaga hadlay arimo u gaar ah Soomaalida ,laguna soo koobi karo siyaasada,samafalka, amaanka iyo horumarka sidii looga caawin lahaa guud ahaanba dadyowga Afka Soomaaliga ku hadla.
Dhinaca Soomaalida waxaa Shirkaas London uga qayb galay wufuud ka kala socday Soomaaliya(TFG),Puntland,Galmudug iyo Ehlu Suna Waja maaca oo isku dhinac ah iyo Somaliland oo iyana dhinac ah.Warmurtiyeed laga soo saaray isla maalintii 23 Feb,markii shirku dhamaaday waxaa ku qornaa 26 qodob,oo dhamaantoodba ka hadlaya guud ahaan arimaha Soomaaliya, sida Siyaasada,nabadgelyada , gargaarka samafalka iyo International Contact Group (ICG) iwm.
Waxaa jira qodob ka mid ah 26 qodob ee Shirkii London ka soo baxay ,oo aad moodo runtii in laysku maan dhaafsan yahay , loona sameeyey runtii macnayaal aad u kala fog oo iska soo hor jeeda. Qodobkaasi waa Q6 ee warmurtiyeedkii ka soo baxay Shirkii London 23 Feb 2012 ,wuxuu u qornaa sida:-
Somali
(6. Shirku waxaa uu aqoonsadey baahida loo qabo in bulshada caalamku ay taageerto wada-hadal kasta ee Somaliland iyo TFG-da ama ciddii beddesha ay ku heshiiyaan in ay yeeshaan si loo caddeeyo xiriirkooda mustaqbalka.)
English:-
6. The Conference recognised the need for the international community to support any dialogue that Somaliland and the TFG or its replacement may agree to establish in order to clarify their future relations.
Sida Soomaaliya looga fasirtay Q6:
Guud ahaan Soomaaliya gaar ahaan magalada Muqdisho aad ayaan looga dabaal degay ,loogana soo dhoweeyey Q6 ee go,aanadii ka soo baxay Shirkii London ,waxaana loo macneeyey:-
“ In Somaliland ka noqotay gooni isu taageedii oo ay Soomaaliya markale ku soo biirayso,in ay soo dhowaatay midnimadii Soomaaliya,in ay dhamaatay kala qaybsanaantii Siyaasadeed ee Soomaaliya iwm.
Sida reer Somaliland u macnaysteen Q6:-
Guud ahaan reer Somaliland na aad ayey ugu dabaal degeen, una soo dhoweeyeen Q6 ee warmurtiyeedkii Shirkii London,waxaanay u fahmeen,una fasirteen si aad iyo uga fog sidii ay Soomaaliya u fahmeen amse u fasirteen.Reer Somaliland waxay ku macneeyeen Q6 Shirka ka soo baxay :-
“Waxaa soo dhowaaday Aqoonsigii Somaliland,hadda ayeynu kala go,aynaa Soomaaliya oo aynu mudo aad u dheer kala roonaan weynay,Soomaaliya waxay tidhi waanu ogolnahay gooni isu taaga Somaliland”
Dhinaca kale waxaa iyana wareer iyo wax lala yaabo ah, cid kasta oo ka qayb gashay Shirkii London ka dhacay 23 Feb ,sida Somaliland,Soomaaliya,Puntland,Galmudug iyo Ehlu Suna Wajamaaca , waxay midwaliba sheegatay amase ay ku dhawaaqday in “Shirkii London” ay dhinacooda guul ka soo hooyeen.Waa laga yaabaa in mid walba gooni amase si hoose loogu sheegay,guusha ay sheeganayso .
Haddii aynu dib ugu yara noqono xusuusta Madaxweynayaashi hore ee Somaliland soo maray,marnaba may qarin jirin in Soomaaliya iyo Somaliland ay wada hadli doonaan maruun ,waxay dhamaantood ku celcelin jireen erayada ay ka mid yihiin “Somaliland waxay la hadlaysaa Soomaaliya —marka la helo Soomaaliya oo mid ah”,haddaba suaasha jawaabta u baaani waxay tahay ma Soomaaliya ayaa mid noqotay ?,mise waxaynu ka mid noqonaynaa Gobolada Soomaaliya?.
Hadal iyo dhamaan aniga waxay ila tahay fasiraada Siyaasadeed ee Q6 ,waxaa garanaya oo keliya cidii soo saartay oo ah Dowladihii iyo Ururadii ku Shiray London 23 Feb 2012,balse inteena kale ninba sidii uu jeclaa ayuun buu u macnaystay.
“Q6 macnayntiisu waa nina sii kuu qor—– nina si kuu qaaday”,
ALLAA MAHAD LEH
Qalinkii Abdi M.Saleiman(Mingiste)
Political Analyst
abdi_saleiman@hotmail.com