Hargeysa, 21 February, 2012(SLpost)-Xukuumada Somaliland,ayaa si balaadhan u soo dhaweeysay dacwada dalka Maraykanka uga bilaabatay Madaxweyne ku-xigeenkii iyo raiisalwasaarihii hore ee Soomaaliya Cali Samatar isla markaana isla markaana jawaab ka bixisay hadalkii ka soo yeedhay madaxweynaha dawlada kumeel-gaadhka ah ee Soomaaliya Shariif Sheekh Axmed.
Wasiirka Kalluumaysiga iyo Khayraadka badda Cabdillaahi Jaamac Cismaan(Geel-jire) ayaa sheegay inay xukuumad ahaan si ballaadhan u soo dhaweeynayaan dacwada lagu qaadayo Cali Samatar iyo cid kasta oo dambi ka gashay shacbiga reer Somaliland, “Xukuumad iyo shacaba dadkeena ku nolol reer Somaliland wixii ka galay danbi ama aynu u sheeganayno danbi. Haddii loo helo maxkamad eegta kiiska taageero ayuu inaga mudan yihiin, ”ayuu yidhi wasiirka Kalluumaysiga iyo kayraadka baddu Cabdillaahi Jaamac Cismaan (Geeljire) oo maanta u warramay Telefishanka HCTV. Isaga o hadalkiisa ku daray, “Sida aad ogtihiinba kiiskan dad muwaadinin oo reer Somaliland ayaa soo dacwooday oo Cali Samatar ka soo dacwooday oo ahaa madaxweyne ku-xigeenkii Soomaaliya ahaana wasiirkii gaashandhiga. Isaguna waxaa uu berigaa warbaahinta u sheegay inuu ahaa ninkii amray in Hargeysa diyaaruhu iyaga oo kacaya madaarkeena ay dadka shacabka duqeeyaan. Markaa dadkii beriga wax ku noqday ayaa dacwada lahaa, waananu taageersan nahay oo isaguna markaa wuu u baahanyahay caddaalad hadii lagu helo oo wuxuu helayaa danbigii lagu helay, haddii aan lagu lahayn oo ay maxkamadi sii dayso waxa uu helay caddaalad oo waxa weeye danbigaa waa lagu waayey oo anagu waanu taageersan nahay isaga iyo wixii la keeni karaba.”
Dhanka kale, wasiirka wasaaradda Kalluumaysiga iyo Kayraadka baddu, waxaa uu wax lala yaabo ku tilmaamay hadalkii ka soo yeedhay Madaxweynaha dawladda kumeel-gaadhka ah ee Soomaaliya Sheekh Shariif kaasoo sheegay in ka qaybgalka shirka London ee Somaliland ay muujinayso inay Somaliland ka soo dabacday halkeedii hore, wasiirka oo arrintan ka hadlayaana waxa uu yidhi, “Marka ugu horaysa waxaad garankarta marka uu madaxweynaha Soomaaliya uu warbaahinta la hadlayo oo Public ula hadlayo oo xilkiisa ayuu gudanayaa oo dadkii uu sheeganayay inuu xukumo ayuu wax u sheegayaa. Laakiin innaga maxaa ina khuseeya weeye? Waxa uu yidhaahdo haddu rajeeyo inay Soomaaliya isku soo noqoto, waa rejadiisa oo waa wax uu isagu niyadiisa ka doortay. Laakiin inaguna waxaynu rejaynaynaa oo aynu ficilkeena ku darnay in gooni-isu-taggeena iyo qarannimadeena ilaashano oo aynaan ku noqon midnimadda Soomaaliya oo aynu halka aynu joogno ictiraaf caalamiya ku helo oo inaguna waynu is ictiraafnay oo nin-na niyadiisa ku qabsan mayno oo niyadiisa isagaa u xorra. Laakiin mid na khuseeya hadalkaasi maaha.”
Somalilandpost.net
Hargeysa, Somaliland