Hargeysa (SLpost)- Xukuumadda Somaliland, ayaa markii ugu horreysay walaac weyn ka muujisay Dhalinyarada u tahriibaya Qaaradda Yurub, iyaga oo sii marayaa dalka Libya, waxaanay sheegay in khatarta ka dhalan karta dalka Libya oo immika qalaalaase siyaasadeed ka socdaan mudooyinkii u dambeeyey ay dhibaato ku keeni karto dhalinyaradda.
Tan iyo intii ay bilaabmeen qalaalasaha siyaasadeed iyo dagaal ee dalka Libiya oo ka mid ahaa dalalka Qaaradda Afrika ee sida weyn loogu tahriibi jiray oo weliba Immika sii xoogaystay, ayaa magaalada Hargeysa waxa toddobaadadii u dambeeyey ka sii qulqulaya dhalinyaro fara-badan oo u sii jeeda dalka Libiya iyaga oo doonayaa inay u sii dhaafan dalalka Yurub iyo meelo kale.
Haddaba, Agaasimaha guud ee Wasaaradda Arrimaha Gudaha Somaliland Cabdillaahi Xuseen Cigge (Cabdillaahi-Balaaki) oo xalay u warramay Telefishinka HCTV ayaa sheegay in Dhalinyarada Tahriibaysaa ay u badan yihiin Xaafadaha Idaacadda, Xero-awr iyo Stadium-ka Hargeysa iyo meelo badan oo kale oo dalka iyo Caasimaddaba ka mid ah. “Runtii waa arrin muddooyinkii u dambeeyey ama bilahan u dambeeyey ee ay dhibaatooyinku ka jireen Libiya waa arrin soo cusboonaatay oo beryihii dambe aad u soo xoogaysanaysa, waana arrin ay dawladdu ka warhayso una badan dadka baxayaa dhalinyaro been loo sheegayo oo u socda inay ka tahriibaan Libiya. Kuwo badan oo baxayna dhexda ayaa laga soo celiyay.” Sidaa ayuu yidhi Agaasimaha guud ee Wasaaradda Arrimaha Gudaha Somaliland Cabdillaahi Xuseen Cigge (Cabdillaahi-Balaaki).
Agaasimaha oo hadalkiisa sii wataa waxa uu intaa ku daray oo uu yidhi; “Waxaannu filaynaa oo aanu ummadda ugu baaqaynaa ama dadweynaha siiba Waalidiinta inay arrinkaa ubadkooda ama dhalinyaradooda ka wacyi-geliyaan ama kala hadlaan iyaga oo dhibaato badani uga iman doonto halka ay u socdaan iyo sida ay u gaadhi lahaayeen. Kuwo badan waannu soo qabanay oo dhexda ayaa laga soo qabtay, haddana waa u diyaar kantaroollada iyo goobaha laga tallaabayo ee dalka Jamhuuriyadda Somaliland. Cidkasta oo lagu tuhmo inay arrinkaa u socoto waa la soo qabanayaa waana laga hawlgelayaa.” “Beryihii hore ee gobollada laga bixi jiray waxa u badnaa Togdheer iyo Awdal. Laakiin, muddadan u dambeeysay halka ugu badan ee laga tahriibaa waa Hargeysa oo dadka ka baxayna waxay u badan yihiin Hargeysa, kuwo badan oo la soo celiyayna way jiraan. Dad badan oo dhalinyaro ah oo waliba u badan Xaafadaha eeriyada Idaacadda, Xero-awr iyo Xaafadaha Stadium-ka ayaa ugu badan dadka baxaya.” ayuu yidhi Agaasime Cabdillaahi-Balaaki.
Agaasimaha Arrimaha guduhu, waxa uu sidoo kale oo uu sheegay in xuduudda Somaliland, siiba dhinaca Wajaale ay Ciidanka Somaliland aad u adkeeyeen oo ay sugayaan dhaqdhaqaaqa dhalinyarada Tahriibaysa oo ay dibna u soo celin doonaan cidda ay qabtaan. Waxaanu tilmaamay khatarta ay tahriibtu leedahay oo uu xusay in loo baahanyahay inay Waalidiintu ubadkooda la socdaan dhinaca ay u dhaqaaqayaan.
Somalilandpost.net
somalilandpost08@gmail.com