Hargeysa(SLpost)-Mujaahid Cali Gurey oo qaar ka mid ah warbaahinta kula hadley magaalada Hargeysa ayaa waxaa uu ka Hadley loolanka ka dhex aloosan xisbiga Kulmiye, waxaana uu sheegay in xisbiga kulmiye loolankiisu uu sameyn ku leeyahay dalka iyo qaranka oo dhan isaga oo sabab uga dhigey in xukunkii dalkan uu gacanta ku hayo.
Waxaa kale oo uu sheegay in dalka oo dhami uu u garbo duuban yahay Kulmiye isla markaana ay haboon tahay in kulmiye dalka laga fardaamiyo waxaana uu yidhi “Labadan sanno ee la kordhiyey ee waliba qasabka aheyd may aheyn muddo kordhin farsamo balse waxaa ay ahayd mid siyaasadeed, siyaasada ka danbeysana waxaa ay aheyd in kulmiye la siiyo wakhti uu ku soo helo musharaxiisa isla markaana kala jabka kaga yimada uu ka soo kabto. Waddanka oo dhami waa uu afduuban yahay oo waa Kulmiye cidii doontaba ha ka soo baxdee waan ta na galineysa in aannu ka hadlo arrinta xisbiga Kulmiye oo aan aheyn xisbigayagii” ayuu yidhi mujaahid Cali Gurey .
Sidoo kale Mujaahid Cali Gurey oo hadalkiisa sii wata ayaa ka hadley fikirkiisa goonida ah ee ah cida xukunka dalku uu ku haboon yahay ayna tahay in hoogaanka dalka majaraha u qabato waxaana uu yidhi “ Aniga oo jabhada ah oo ay dagaalkaba haystaan waxaan ahaa qoladii mutacalimiinta ahaa ee ay hangoolka labada farraar ahaa iskaga hayeen kornaylo diid ayey ii bixiyeen shaqsiyan ma jecli xukunka askariga ah, askarigu waa amar waayo aragtida aynu u leenahay xukun askarina ma fiicna oo laba nin beynu soo aragnay waa Siyaad Barre iyo Cabdilaahi Yuusuf .
Muuse Biixi askari nimo kuma tartaamayo ee waa tariikhdiisa laakiin kolay anigu shaqsiyan ma jecli dunida saddexad in nin askri ahi xukumo waayo dalkaba cidi ka fur furi meyso “ ayuu hadalkiisa ku soo koobay halkiisii Mujaahid Cali Gurey.
Mujaahid Cali Gurey ayaa u muuqata in uu weerarayo Muuse Biixi oo ay labadooduba isku jabhaddii SNM ka soo wada dagaalameen. Sababta rasmiga ah ee uu Muuse u weerarayo iyo cidda kale ee uu la safan yahay ayaannu si toos ah u caddayn Cali Gurey, walaw uu sheegay in aannay ka ahayn Muuse nacayb ee ay taariikhiida Muuse askarinimo tahay.
Somalilandpost Office, 2015