Aynu waayaha dib u yar millicsanno. Weli maynaan lumin kartidii aynu u lahayn niyad-samidda iyo wada tashiga dumuqraadiga ah, kaas oo aynu ka dhaxalnay awoowyaasheen iyo dadkii inaga horeeyay ee wadankan aasaasay , kaasi oo aasaas u ah guusha ay Somaliland gaadhay ilaa hadda. Waxa aynu u baahannahay in aynu ilaashano damiirkii xalnaa iyo daacadnimadii ahayd inaynu si wada jira u ilaashano qarankeena kaas oo ah aayaheenii oo aynu ku soo tabcaynay labaatankii sanadood ee ugu danbeeyay ,sidoo kale waa inaynu ilaashanaa wada shaqayntii, is ixtiraamka iyo ilaalinta madaxbanaanida saxaafada taas oo aasaas u ah qaranimadeeda iyo wax wada lahaanshaheenaba , hadaba khudbadii daraad ee madaxwaynaha ayaa ahayd mid laga dhex dhadhansanayay hadalo isugu jiray hadidaad, cajo juglayn iyo aarsi laga aarsanayo saxaafada madaxa banaan taasi oo uu madaxwaynuhu ku weeraray warsidaha Horn Cable sheegayna inuu baahiyay waxyaabo lidi ku ah qaranimada Somaliland, amakaag ayay igu noqotay markaan maqlay madaxwaynaha oo daraad sidaa uhadlaya, waxay ahayd daraato markii uu madaxwaynaha hada talada hayaa uu amaanta u soo jeedinayay saxaafada madaxa banaan ee ka hawl gasha Somaliland ee uu lahaa “saxaafada Somaliland waa mid runta sheegta , isheeduna qabato musuq maasuqa” hadaba madaxwayne shalayto markaad mucaaradka ahayd waa tii aad garabka saaraysay saxaafada ka shaqaysa Somaliland ee ma maanta ayay kula qadhaadhaatay oo aad taladii dalka isku hubsatay, hadaba saxaafada Somaliland ayaa iyadu ah rukunka afaraad ee qarankan taas oo ilaayo maalintii xoriyada dalkan dib loola soo noqday hadh iyo habeen u taagnayd siday qarankan u garab istaagi lahayd taasi oo ay in badan kala kulmeen hadidaad, cajo juglayn iyo aarsi joogto ah iyagoo saxafiyiintu ku gudo jira shaqooyinkooda kala duwan. Hadaba khubadii madaxwaynaha ka bacdi ayaa waxaa dhacday in madaxwaynahu qaranka Somaliland uu amar ku bixiyay in albaabada loo laabo teleefishankii ugu caansanaa Somaliland kaasi oo ay warkiisa la socdeen dhamaan shacabka Somaliland sidoo kalana lagala wada socdo daafaha dunida, hadaba maxaa uu madaxwaynuhu ku xidhayaa Horn Cable Tv ? sidaan daawanayay horn cable tv wuxuu soo daayay habeen dhawayto barnaamij uu ku qaada dhigayo shirka taleex iyo arimihiisa kuwaasi oo cadhada ugu badan ee xukuumada sababay markii la soo qaatay hadal uu jeediyay madaxwaynihii hore ee jamhuuriyada Somaliland Daahir Rayaale maalintii xilka uu wareejinayay isaga oo leh “ siilaanyoy waxaan kugu wareejiyay wadan dhamaystiran ee shacabka waa inay kaa helaan wadankaa oo dhamaystiran ” taas oo xukuumadu uu hadalkaasi ku noqday sida waran taabtay meel boog ahayd, taas oo ay sababtay markii meelo ka mid ah Somaliland lagaga dhawaaqay maamul goboleedyo cusub , hadaba xadhigan iyo hanjabaadan lagula kacay saxafiyiinta kala duwan ee maanta cabashada la hor tagay madaxtooyadu maxay galabsadeen, maxaa sababay in lagu tunto oo ay xukuumadu cagto mariso iyagoo si salmi ah u sheeganaya dhibtooda, hadaba madaxwayne siilaanyo miyuu ilaaway in cajo juglaytani uu hada bilaabay ay tahay tii galaafatay xukuumadii ka horaysay ee ay eeday, sidoo kale madaxwaynuhu miyaanu ogayn cabudhinta saxaafada ay hore u eedeen kalidii taliyayaal awood badan ku lahaa caalamkan kuwaas oo hadh cad afka dhulka loo daray, hadaba xukuumadan madaxwayne siilaanyo oo talada haysay muddo sanad iyo sideed bilood ah ayaa noqotay mid ay eedeen bahwaynta saxaafadu guud ahaan kuwaasi oo intan ay xukuumadina joogtay ay tahay markii ugu badnayd ee ay waligeed tacadi intan leeg ay la kulmaan suxufiiyiintu, sidoo kale madaxwayne siilaanyo miyaynaan odhan Karin wuxu cagta saaray dhabihii maamuladii kali talisyadu ay ku cunoqabatayn jireen madax bananida iyo rayi cabirista warbaahinta ,maadaama oo uu taagan yahay wax dhaliila la igama sheegi karo, hadaba qarankan Somaliland ayaan odhan karnaa wuxuu ku taagan yahay dhardhaaro ay kaw ka tahay saxaafadu taas oo ay Somaliland halkan ku soo gaadhay, sidoo kale marka aad aragto tacadiyada saxaafada lagu cuno qabataynayo iyo car juug dhehdu waxay astaamo waawayn u yihiin burburka xukuumadahaha, sidoo kale ayaynu ka war qabnaa in markii uu siyaad bare uu isku dayay inuu cuna qabatayn saaro saxaafada iyo dadka abwaanada ay keentay in wakhti yar lagu burburiyo dawladiisii awooda badnayn, hadaba cabudhintan saxaafada lagu hayo ayaa aad moodaa inay hada caadaysatay xukuumadani taasi oo hadhka cad tacadiyo ba’an kula kacaysa saxafiyiinta gudanaya shaqadoodu, guntii , gabagabadii iyo gunaanadkii waxaan u soo jeedin lahaa in xukuumada talada haysaa ay ka waan tawdo dhibaatoyinka ay ku hayso saxaafada, hadayse sidan ku sii wado waxaa iman doonto ayaan ay hadhka cad dariiqa saari doono sidii xukuumadihii ka horeeyay ee talada dalka soo maray, madaxwayne Siilaanyana waxaan leeyahay daraad ayay ahayd markii aad lahayd saxaafadu way madax banaan tahay ee aad mucaaridka ahayd ee ma maantay kula xumaaday markaad taladii dalka isku hubsatay kursigiina aad ogaatay inaad si raaxo leh ugu fadhido.
Qalinkii: C/fataah Sh.Nuux Jaamac ( Suldaanka)
Social Activist
Email: Samriye99@hotmail.com
Mobile: 4474468