Jabuuti (SLpost)- Xogo Qarsoodi ah oo dhawaan la shaaciyey, ayaa sheegaya in Raysal-wasaarahii geeriyooday ee dalka Itoobiya Melez Zenawi iyo Madaxweynaha Jamhuuriyadda Jabuuti, ismaaciil C. Geele, ay ka wada hadleen heshiiska Somaliland kula gelayso shirkada Bollore ee dalka Faransiiska laga leeyahay maamulidda Dekeda magaalada Berbera.
Xogahan qarsoodiga ah oo laga helay Dokumentiyo si hoose looga u baxay Safaaradda Maraykanku ku leeyahay magaalada Jabuuti, ayaa bayaamiyey in Wasiirkii Arrimaha Dibedda Xukuumadii Rayaale, Cabdillahi Maxamed Ducaale, kulan uu la yeeshay Safiirkii Maraykanka ee Jabuuti J. Swan, bishii January 4, 2010 u sheegay in Raysal wasaarihii hore ee Itoobiya Melez Zenawi khadka telefoonka kula yeeshay Madaxweynaha Jabuuti wada-xaajood ku saabsan heshiiska shirkadda Bollore iyo Somaliland ee ku saabsan dekedda Berbera, kaas oo ilaa wakhtigaas soo taxnaa, sida lagu shaaciyey barta Internetka ee xog-keydiyaha Wikileaks.
Xogaha qarsoodiga ee laga helay Safaarada Maraykanka ee Jabuuti, ayaa lagu sheegay in Madaxweyne Ismaaciil Cumar Geelle aanu wax diidmo ah ka muujin qorshaha heshiiskaa, sida uu sheegay Cabdillahi M. Ducaale.
“Somaliland iyo Itoobiya wakhtigan horumar ayey ka gaadheen wada- xaajoodka lagula jiro shirkadda Bollore ee maamulida dekeda Berbera. Isla markaana, safiirka Faransiiska ee Itoobiya Jean-Christophe Belliard kaalin weyn ayuu ka qaatay heshiiskaa,” sidaa waxa yidhi Wasiirkii Khaarajiga Xukuumaddii Rayaale, Cabdillahi M. Ducaale, sida ay lagu baahiyey macluumaadka laga helay safaaradda Maraykanka ee Jabuuti oo xogahani soo xiganayaan.
Haseyeeshee, sida xaqiiqadu tahay, Dekedda Magaalada Jabuuti oo daboosha baahida inta badan baahida ganacsiga dibadda ee dalka Itoobiya, ayaan haba yaraatee ogoleyn loollan Ganacsi oo kaga yimaadda Dekedaha waaweyn ee dhiggeeda ah sida Dekedda Berbera, iyada oo la ogsoon yahay in daba-yaaqada sannadkii tagay uu madaxweynaha Jabuuti dhagax-dhigay deked cusub ee laga hirgelinayo deegaanka Dooraale oo masaafo yar u jira xuduudka Jabuuti la wadaagto Somaliland.
Macluumaadkan laga helay safaaradda Maraykanka ee Jabuuti ee lagu baahiyey barta Internetka ee Wikileaks, ayaa ku soo beegamaya iyada oo dhowaanahan la hadal-hayey warar ku saabsan heshiis maal-gashi baaxad leh oo lagu samaynayo Dekedda magaalada Berbera, kaas oo la filayo inuu dhexmaro xukuumadda Somaliland iyo shirkada Bollore ee dalka Faransiiska laga leeyahay.
Sidoo kale, warar qaar ayaa sheegay in safarka madaxweynaha Somaliland todobaadka dambe ugu amba-baxayo waddamada dibadda uu qayb ka yahay dhammaystirka Heshiiskan, isl amarkaana ay masuuliyiinta shirkaddaas ku kulmi doonaan Magaalada Paris ee dalka Faransiiska oo Xaruntoodu tahay.
XIGASHO: Wargeyska HIMILO