Hargeysa (SLpost)- Madaxweynaha Jamhuuriyadda Somaliland, Mudane Muuse Biixi Cabdi, ayaa markii ugu horraysay ka hadlay muranka ka taagan Xeer 14 iyo go’aanka ay axsaabta mucaaridku kaga soo horjeesteen furista ururrada, waxaanu ku baaqay in la ixtiraamo xeerarka iyo Dastuurka dalka.
Madaxweyne Muuse Biixi oo maanta ka hadlay madal uu ku daah-furay koobka horyaalka horyaallada, ayaa tilmaamay inaan cidina buuq iyo dood ka keeni Karin in ururradii furmayaan iyo in kale, balse u taas jideeyey oo la raacayo xeer No. 14 oo dhaqangal ah, derejooyinkii sharci ee looga baahnaana si sharci ah kaga gudbay.
“Dalkeennu xeer ayuu ku dhaqmaa, Dastuurka iyo xeerarkii ay goleyaashu ansixiyeen baa ina hoggaamiya, furista Axsaabtana qofna kama hadli karo oo waxaynu raacaynaa oo guddoon ah xeerka 14 oo sharci ah oo labada gole ay ansixiyeen, madaxweynuhuna saxeexay, oo dhaqangal ah, waxase lagu muransan yahay soo jeedinta wax-ka-beddel iyo kaabis oo aan golayaashu ansixin, xeerkuse waa xeer jiray oo dhaqangal ah, xeerkaasina tallaabooyin buu ina farayaa, wuxuuna ina faryaa in tallaabo walba loo diyaar garoobo inta bisha December ka horraysa, kuwaas oo kala ah madaxtooyada iyo furista Axsaabta, waxa kale oo ina sugaysa oo sharcigeedii inaynu dhammayno ay tahay golaha guurtida oo in badan joogay, waana muddo gaaban oo ay doorashooyin badani inagu soo beegan yihiin.”
Madaxweynuhu waxa uu ka hadlay xeerka furista ururrada iyo axsaabta ee xeer No.14 iyo waxyaabaha uu ina farayo, waxana uu si cad u sheegay in marka la gaadho bisha May ee sannadka soo socda ay si rasmi oo sharci ah u bilaabmi doonto diiwaangelinta ururrada siyaasadda ahi.
“Xeerku wuxuu ina farayaa xisbiyada qaranka ee saddexda ah in tobankii sannoba mar la doorto oo ay ka dhacayso ruqsadda ay ku galaan ruqsadda siyaasadda tobankii sanoba maanta saddexda xisbi ee joogaa liisanka ay ku haystaan siyaasadda ay dadka dheer yihiin waxay kaga dhammaanaysaa 26-ka December, 2022-ka, sida uu qeexayo xeer No. 14, wuxuu kale oo isla xeerkaasi ina farayaa in marka ay ka hadho lix bilood dhammaadka liisanka xisbiyada la furo ururradii, waxayna taasi ku beegan tahay bisha May ee 2022-ka, sidaa darteed xukuumad ahaan annagoo fulinayna jidkaa xeerku jeexay bisha May haddii Allah yidhaahdo Ururradii waa furmayaane nin walowba ku biyo cab, xeer baana furaya qofna ma hor joogsan karo,”ayuu yidhi madaxweyne Muuse Biixi Cabdi.
Madaxweynaha Jamhuuriyadda Somaliland, Mudane Muuse Biixi Cabdi waxa uu farriin cad u diray hoggaanka xisbiyada mucaaridka ee qaylada ka keenay dhaqangalka xeerka furista ururrada, isaga oo ugu usoo jeediyey inay yareeyaan doodaha sharciga baalmarsan ee ay ku diidayaan furista ururrada, waxana uu caddeeyey in iyada oo la la raacayo xeer No.14 loo diyaar garoobo in doorashooyinka Guurtida, madaxtooyada iyo furista ururrada mid walba waqtigeeda loogu qaban lahaa, waxana uu yidhi,”Xisbiyada qaranka waxa ku waajib ah inaanay ka doodin furista, waayo waa sharci, maanta guddoomiyaha WADDANI wuxuu yidhi xisbiyada in la furo waan la oggol nahay, haddaa maxaa lagu murmayaa sidaa sharcigu yahay baynu yeelaynaaye, waxa kale oo Iyana sharci ah in waqtigii loogu talo galay doorashada madaxtooyada iyo u diyaargarowgeedii iyaduna waa waajib oo waqtigeedaynu maraynaa oo u diyaar garoobaynaa, mar haddii aynu sharcigaa iyo waddadaas hayno garan maayo waxa muranka iyo buuqa keenaya ee labada xisbi ee mucaaridka ahi ay ka boodan yihiin, saddexdii doorasho mid walba waqtigeedii siduu sharcigu jideeyey mid walba waqtigeedii aynu u diyaar garowno garan mayo sabab looga dido.”
Madaxweynuhu waxa uu usoo jeediyey in hadallada beer laxowsiga ah ee kasoo yeedhay hoggaanka axsaabta mucaaridka ee ay ku sheegayaan inay u diyaar u yihiin furista ururrada inay ka muuqato ficillada guddoomiyaha wakiillada iyo xubnaha kale ee taabacsan ee ka hadhay aqlabiyaddii golaha ee aragtidooda ku muujiyey dacwaddii ay maxkamadda u gudbiyeen.
Somalilandpost.net
contact@somalilandpost.net