Hargeysa (SLpost)- Guddoomiye ku-xigeenka Xisbiga Mucaaridka ah ee WADDANI ahna ku simaha Guddoomiyaha Axmed Muumin Seed, ayaa Xukuumadda Madaxweyne Siilaanyo ku eedeeyay inay lumisay intii ay xilka haysay 46 xildhibaan oo ka tirsan Baarlamaanka Ingiriiska oo xilligii Xukuumaddii Rayaale taageersanaa Qadiyadda Madaxbanaanida Somaliland.
Guddoomiye ku-xigeenka Waddani waxa uu hambalyeeyey tallaabada golaha deegaanka degmada Sheffield ku aqoonsadeen madax-bannaanida Somaliland, balse waxa uu tilmaamay inay xukuumadda Siilaanyo lumisay kalsoonida xildhibaanno tiradoodu ka badan tahay kala-badh golaha Wakiillada Somaliland oo ka tirsan Gole-weynaha Boqortooyada Ingiriiska, kuwaas oo uu tilmaamay inay si weyn u taageersanaayeen qadiyadda madax-bannaanida Somaliland wakhtigii dawladdii UDUB talada dalka haysay.
Ugu horeyn, guddoomiyuhu waxa uu hambalyeeyey tallaabada ay qaadeen golaha deegaanka degmada Shefield ay tahay mid ay ka soo shaqeeyeen shacabka Somaliland kuna amaanan yihiin laakiin ay Xukuumaddu isku sawirayso.
“Waxaan halkan aan kalmad kooban oo hambalyo ah aan u dirayaa Golaha Deegaanka Ee dagmada Sheffield oo runtii qabtay arin muhiima oo aynu u baahnayn hadaynu nahay reer Somaliland,Mahad naq balaadhan iyo hambalyo ayaan u jeedinayaa hawshaa balaadhan ee ay noo qabteen, waxaan iyagana aan aad iyo aad ugu mahad celinayaa dhamaanba taageerayaasha xisbiga WADDANI oo iyagu marka runta la sheego door weyn aad uga ciyaaray iyo dhamaan cid kasta oo ka qayb qaadatay iyo waliba dhamaanba jaaliyada reer Somaliland ee ku nool dagmada Sheffield iyo cid kasta oo hawshaa ka qayb qaadatayna waxaan leenahay waad mahad santihiin,” ayuu yidhi Guddoomiye ku-xigeenka Waddani.
Guddoomiye ku-xigeenka koobaad ee Xisbiga Mucaaridka ah ee WADDANI Axmed Muumin Seed waxa uu ku dhaliilay Xukuumadda Madaxweyne Siilaanyo inay ka seexatay aqoonsi raadinta Somaliland isagoo tilmaamay inay ku liidato siyaasadda Arrimaha dibadda oo ay hoos u dhacday Qadiyadda Somaliland dhanka dibadda intii uu Xilka Madaxweynenimo hayay Madaxweyne Siilaanyo
“Runtii dalkeena marka aynu dib ugu noqono xukuumadihii isaga kala danbeeyey waxaa marag madoona oo aad ogaydeen in Xukuumadda Madaxweyne Siilaanyo uu hogaaminaayo Xukuumaddii ka horaysay ee Daahir Rayaale wakhtigii ay iyadu jirtay waxaa ad inoo taageeri jirey baarlamaanka Ingiriiska oo 46 Xildhibaan ayaa ina taageersanaayeen,Xukuumadan imika jirta 46-Kii Xubnood meel ay ku danbeeyeen iyo cid kadaba tagtay toona ma jirto taasina waxaa ay caddaynaysaa in Xukumaddani ay ku liidato arimaha dibadda iyo raadinta ictiraafka Somaliland.
Maanta halkaa aynu marayno horaan uga socon lahayn hadii dawladu ay aad u dedaasho waxaa maantana ay Xukuumaddu ay isku sawiraysaa arinkaa golaha deegaanka ee Sheffield oo shicibka iyo Xisbiyada Mucaaridka ahi ay xoog uga shaqeeyeen oo ay Xukuumaddu ay tigidho badan ay u goosatay markaa waxaan leenahay Xukuumadda waa inay ka shaqaysaa oo ay u hawl gashaa dalkan sidii aqoonsi loogu helilahaa,” ayuu yidhi Guddoomiye ku-xigeenka koobaad ee Xisbiga Mucaaridka ah ee WADDANI.
SOMALILANDPOST.NET