HARGEYSA (SLpost)- Xisbiga Mucaaradka ah ee Waddani, ayaa maanta munaasibad soo-dhawayn ah u sameeyey Siyaaiyiin, Xildhibaanno iyo taageerayaal miisaan culus ku lahaa Xisbiga talada haya ee Kulmiye, kuwaas oo si rasmi ah ugu biiray Xisbiga Waddani.
Munaasibadda soo-dhawaynta ee Xisbiga Waddani ku qaabilay taageerayaasha Cusub oo lagu qabtay Hotel Crown ee magaalada Hargeysa, waxa ka qayb-galay guddoomiyaha Xisbiga WADDANI Md Cabdiraxmaan Maxamed Cabdilaahi (Cirro), Hoggaanka Sare iyo masuuliyiinta Xisbigaas, Siyaasiyiin, Xildhibaanno iyo taageerayaasha u diga-rogtay Waddani oo isugu jiray haween iyo dhalinyaro hore uga tirsanaa Xisbiga Kulmiye.
Taageerayaasha ku biiray Xisbiga Waddani oo uu horkacayey Xildhibaan Siciid Cilmi Rooble oo ka mid ahaa mudaneyaasha ugu miisaanka culus ee xisbiga Kulmiye ugu jiray Golaha Wakiillada, ayaa ugu horeyn munaasibadda ka hadlay, waxaanu ka hadlay sababaha ku kallifay in isaga iyo taageerayaashiisuba ka baxaan Kulmiye una diga-rogtaan Waddani.
“Horta maanta waa maalin wayn. Waa Cashuura oo Illaahay Qur’aankiisa noogu sheegay, waa maalintii ay guulaysteen Nabi Muuse iyo Taabiciintiisii,inaguna maanta qoladeena soo biirtay Xisbiga WADDANI, sidii Nebi Muuse iyo Taabiciintiisii badda ayay ka baxeen, inaguna maanta dooxa ayaynu ka tallaabaynaa oo Cirro ayaynu u codaynaynaa oo codkeena siinaynaa.
Waxa kale oo aan idiin sheegayaa samanba waxbaa socda oo dabaylaha waa aynu naqaana dabayshu waxa ay u eegtahay maanta Xisbiga WADDANI, sanadihii ugu danbeeyey ee nalagu soo biirayey ee Xisbiga KULMIYE lagu soo biirayey 2009-kii,iyo 2010-kii horaanteedii,ayaa ay maanta u eegtahay oo ay wajigeedii leedahay,oo sidaas maanta WADDANI loogu soo qul-qulaayo ayaa ay ahayd,” ayuu yidhi Xildhibaan Siciid Cilmi Rooble.
Xildhibaan Aareeye oo isaguna munaasibadda ka hadlay, ayaa Xisbiga Kulmiye iyo Xukuumaddiisa ku eedeyey inay siyaasad qalloocan ku hagayaan dalka, taasina sababtay qoqobnaan soo kala dhex-galay dalka, muddadii ay Xilka hayeenna dalku dalku dhex-dabbaashay cadaalad darro baahsan.
Xubno ka mid ahaa Siyaasiyiinta iyo Taageerayaasha oo halkaas ka hadlay, ayaa sheegay inay ku faraxsan yihiin inay cududdooda taageero ku biiriyaan Xisbiga Waddani, iyaga oo ballan-qaaday inay taageeradooda u huri doonaan xisbiga mucaaradka ah ee Waddani.
Xoghayah Guud ee Xisbiga WADDANI, Xildhibaaan Rayte, Siyaasi Siciid Sulub Maxamed, Xoghayaha Arrimaha Gudaha ee Xisbiga WADDANI iyo masuuliyiin kale oo ka tirsan Xisbiga WADDANI oo iyaguna halkaasi ka hadlay, ayaa si balaadhan dhankooda u soo dhaweeyey Siyaasiyiinta, Xildhibaanada iyo Taageerayaasha ku biiray Xisbiga WADDANI, waxaana ay sheegeen in ay gacmo furan ku soo dhawaynayaan.
Guddoomiyaha Xisbiga Mucaaradka ah ee WADDANI Md Cabdiraxmaan Maxamed Cabdilaahi (Cirro) oo gunaanadkii munaasibaddaas khudbad dhinacyo kala duwan taabanaysa ka jeediyey, waxa uu soo dhaweeyey taageerayaasha ku biiray xisbigiisa.
“Waxaan aad iyo aad aan u soo dhawaynayaa,Masuuliyiintii,Madaxdii,Haweenkii,dhalinyaradii iyo taageerayaashii ku soo biiray Xisbiga Mucaaradka ah ee WADDANI,kana soo diga rogtay Xisbiga KULMIYE,aad iyo aad ayaanan dhamaantood aan ugu mahad naqayaa,waxaanan leeyahay ku soo dhawaada Xisbiga WADDANI,qalbi furan iyo gacmo furan ayaanan idin ku soo dhawaynayaa,” ayuu yidhi Md Cirro. Isaga oo hadalkiisa sii watay, waxa uu intaas ku daray, “Siyaasiyiin caan ah oo I hortaagnaa oo uu ka mid yahay Xildhibaan Siciid Cilmi Rooble,oo ay ka mid ahaayeen Taageerayaashii faraha badnaa ee reer Gabilay,guddoomiye iyo muuse iyo dhalinyaradiisiiba,Cawil iyo Dr Cabdiba iyo dhamaanba masuuliyiintii kale ee aanan halkan magacooda ka sheeginba waxaan leeyahay intaba walaalayaal ku soo dhawaada gacmo furan,” ayuu yidhi Md Cabdiraxmaan Maxamed Cabdilaahi.
SOMALILANDPOST.NET