Hargeysa (SLpost)- Xisbiga Mucaaridka ah ee UCID ayaa jawaab kulul ka bixiyay hadal wasiirka Arimaha Gudaha Somaliland Md Cali Maxamed Warancade ku weeraray Gudoomiye Faysal Cali Waraabe.
Xubno Jagooyin sar-sare ka haya Xisbiga Cadaalada Iyo Daryeelka oo maanta shir jaraa’id ku qabtay xarunta xisbiga ee Magaalada Hargeysa, ayaa ku tilmaamaay dhaliilo uu shalay Md Warancade ku duray Gudoomiyaha Xisibigooda mid seegan marinkiisa , iyada oo wasiirka ku tilmaamay masuul dayacay hawlihii qaranka uu u hayay, kana baylah yihiin shaqooyin ka muhiimsan u jawaabista mucaaradka.
Xoghayaha arrimaha bulshada ee Xisbiga UCID Cabdiraxmaan Axmed Cali, oo shirkaas Jaraa’id masuuliyiintii ka hadashay ka mid ahaa , ayaa sheegay in cida uu Gudoomiyohoodu la hadlayay ahayd wasiirka Arimaha Didaba Somaliland , laakiin aanay ahayn Wasiirka Arimaha Gudaha, hadalka Wasiirul Daakhiliguna u muuqdo mid seegan marinkiisii.
‘’Waxa wanaagsan marka uu ninku heer wasiir yahay inuu waajibkiisa garto, Faysal wasiirka arrimaha dibada ayuu u jawaabayey oo cadeeyay inaanay xisbiyada mucaaridka ahi wada-hadallada ka qayb galeyn doorkan oo xaqna uma laha ma wuxuu garan waayey cidda loo jawaabayaa jawaabiye, waxaaanu leenahay wasiir safaarada tobanka talaabo kuu jirta ayay shaqadaadii taalaa, oo muwaadiniintii baasaboorka Somaliland sidatay inta garabka lagu dhufo ayaa kuwa baasaboorka Garoowe sita iyo reer xamar laga siinayaa fiisayaashii.’’
Waxa uu Mudane Cabdiraxmaan Axmed, Xog-hayaha Arimaha Bulshada ee Ucid, intaas ku daray . ‘ Shaqadaadu waxa weeyi RRU dadkii shacabka ahaa iyo dawladii kala dilaysa ee keenaysa khalkhalka iyo sumcad xumada, inaad wax ka qabato waxaanse u arkaa wax aad ugu talo gasheen oo in badan baa qaranimada Somaliland iyo ictiraaf raadinteed caqabado iyo wanjalba loo dhigay waana la ogaaday in dalka waxa ilaashanayaa ay yihiin shacabka ee aanay ahayn siyaasiyiin, annagu waxaan u aragnaa sida dadka loo galayo, siyaasadii oo indhaha looga ridayo, amaankii loo khalkhalinayo annagu waxaanu u aragnaa kaarto dadban oo la doonayo in dalka Soomaaliya loogu daro.’’
Xoghaye ku xigeenka arrimaha bulshada ee xisbiga UCID Xuseen Badmaax, oo isna Shirkaas Jaraa’id ka hadlay ayaa sheegay inaanay Xisbi ahaan aqbali doonin , natiijada ka soo baxda kulanka wufuuda Somaliland iyo kuwa Soomaaliya ku dhax mari doona wadanka Turkiga. ‘’Shirkaasi haddii sida ay dawladu damacday ee ay ku dhawaaqday u socdo maaha mid la qaadan karo, arrinku waa arrin qaran oo dal baynu dib ula soo noqonay, ciddii aynu kala soo noqonay marka loo tagayo ee wada-hadal ku saabsan qaranimada Somaliland laga wada hadlayo waa qasab in saddexda xisbi qaran ay talo isugu yimaadaan iyo labada gole ee sharci dajintu.Waxaad moodaa sida ay xukuumadu ku waddo inay qarankii Somaliland ka dhigtay gobol ka mid ah Somaliya, xisbiga cadaaladda iyo daryeelka ee UCID wuxuu halkan ka cadaynayaa inaan qaranimada lagu aamini karin, afar wasiir oo carara oo farta loogu yeedho oo waxay meesha la tagayaan aanay cadayn, lagana sii wada tashan.’’
Xuseen Badmaax, Xog- Haye Xigeenka Arimaha Bulshadu , waxa uu ku dheeraaday qaabka iyo hanaanka haboon ee ay tahay in loo wajaho marka ay taagan tahay qadiyada iyo madax banaanida Somaliland, ‘Waxaan la yaabay wasiirka arrimaha dibada oo hadlaayey oo yidhi dawlada ayaa maandhayt u haysata waxa laga yeelaayo madax banaanida Somaliland, golayaasha sharci dajinta, garsoorka iyo saddexda xisbi qaran waa in talo laysugu yimaado marka ay taagan tahay madaxbanaanida Somaliland oo ah mid aan gorgortan marnaba iyo cidnaba aan lagala gali karin, waana mid aanu taladeeda wax ku leenahay.’’
Sida oo kalena wuxuu wax lala yaabo ku tilmaamay hadalkii wasiirka arimaha guduhu ku weeraray Gudoomiye Faysal, Mudane Badmaax isagoo hadalka sii wata wuxuu yidhi: ‘’ waxa kale oo cajiib ah oo wax lagu qoslo ah wasiirka arrimaha gudaha oo kala garan la xilkii uu masuulka ka ahaa ee arrimaha gudaha iyo xilka uu hayo ee arrimaha dibada, xalay markii uu hadlaayey waxaanu u sheegaynaa wasiirka arrimaha gudaha haddii cidi basaas noqonayso adaa ahaa hanjabaada aad tv-ga ka hanjabaysay adeer maamulka dalka ku hagaaji.’’.
Shirka Jaraa’id ee Masuuliyiinta Ucid ayaa ka dambeysay, kadib markii Wasiirka Arimaha Gudaha Somaliland mudane Cali Maxamed Waran-cadde, uu jawaab ka bixiyey hadal ka soo yeedhay gudoomiyaha Xisbig cadaalada iyo Daryeelka ee UCID, Eng Faysal Cali Waraabe , oo sheegay in Hadii xukuumadu ku soo dari weydo asxaabta mucaaradka ah , xubnaha ka qayb gallaya shirka wadahadala Somaliland iyo Somaliya ku dhex mari doona bishan dhexdeeda wadanka Turkiga, ay Xisbiyada Mucaaradkuna si gaar ah wada hadal ula yeelan doonaan Dowladda Soomaaliya.
SOMALILANDPOST.NET