Washington (SLpost)- Xildhibaanno ka tirsan Aqalka Sare ee Maraykanka (Senate), ayaa maamulka xukuumadda madaxweyne Biden u gudbiyey warqad ay ku codsanayaan in dowladdoodu xidhiidh diblomasiyeed la yeelato Somaliland.
Sagaal Xildhibaan oo ka kala tirsan Guddi-hoosaadka Aqalka Senate-ka u qaabilsan Arrimaha Dibadda, Afrika, Caafimaadka dunida iyo Xuquuqal-iinsaanka, ayaa waraaq ay wada-jir ugu saxeexan yihiin u diray Wasiirka Arrimaha Dibadda Maraykanka Antony Blinken oo ay ugu baaqeen in kor loo qaado xidhiidhka Somaliland.
Mudaneyaasha oo dhammaantood ka soo jeeda Xisbiga Jamhuuriga marka laga reebo hal xildhibaan, waxay ugu baaqeen xukuuumadda madaxweyne Biden in dowladda Maraykanku kor u qaaddo cilaaqaadka Somaliland iyadoo la tixgelinayo bogcadda istaraatajiga ah ee ay ku taallo, hirgelinta nidaamka dimuqraadiyadda iyo dedaallada ay iskeed ugu guulaystay la-dagaalanka argagixisada, budhcad-badeedda iyo sidoo kale la eegayo xidhiidhka ka dhexeeya Taiwan.
“Waxaanu warqadda u qornay inaan ku baraarujinno Maamulka Biden inay tixgelin siiyaan sidii ay u kordhin lahaayeen hirgelinta xidhiidh qototo dheer oo dhexmara Somaliland ee khuseeya dhinacyada diblomaasiyadda, dhaqaalaha iyo amniga,” sidaas ayay qoreen xildhibaannadu, waxaanay iyagoo faahfaahinaya muhiimadda ay tani leedahay, “Marka la eego Bogcadda juquraafeed ee Somaliland kaga taallo Gacanka Cadmeed, taageerada joogtada ah ee dimuqraadiyadda u hayso, iskaashiga ka hortagga argagixisada, budhcad-badeedda iyo khataraha kale ee amniga ee gobolka, xidhiidhka ka dhexeeya Taiwan, iyo awoodaha dhaqaale ee sii kordhaya waxay Maraykanka u damaanad-qaadayaan inuu ka raadiyo fursado dheeraad ah oo ay iska kaashan karaan Somaliland.”
Mudaneyaashu waxa ay warqaddooda ku xuseen in Somaliland mudan tahay in lagu tixgeliyo guulaha ay ka gaadhay dhinacyada dimuqraadiyadda, ammaanka iyo horumarka, waxaanay si gaar ah u ammaaneen hannaanka doorashooyinka Somaliland.
“Anagoo ka duulayna arrimahan siyaasadeed, dhaqaale iyo amni ee Somaliland leedahay, waxaanu maamulka u soo jeedinaynaa inay kordhiyaan xidhiidhka dublamaasiyadeed ee ay la leeyihiin Somaliland, isla markaana ay tixgelin siiyaan inay xafiis diblomaasi ka furan Hargeysa,” sidaas ayaa lagu yidhi warqadda ay xildhibaannadu qoreen oo intaas ku daray, “Kordhinta iskaashiga Somaliland waa in ay noqotaa mudnaanta koowaad oo ay ka wada faa’iidaysan doonaan danaha Maraykanka iyo Somaliland.”
Xildhibaannada baaqan u diray maamulka Biden oo ay hoggaaminayaan guddoomiyaha guddi-hoosaadka arrimaha Dibadda Aqalka Senate-ka, xildhibaan Michael McCaul iyo Gudddoomiyaha guddi-hoosaadka Arrimaha Afrika, Caafimaadka iyo Xuquuqda bani’aadamka Chris Smith, waxa ka mid ah Brian Fitzpatrick, Tom Malinowski, Peter Meijer, Guy Reschenthaler, Kay Granger, Young Kim iyo Steve Chabot.
Baaqa Xildhibaannada Aqalka Odayaasha ee Maraykanka, ayaa ku soo beegmay xilli uu madaxweynaha Somaliland booqasho rasmi ah ku jooga caasimadda dalkaas ee Washington, kaddib markii uu marti-qaad ka helay dowladda dalkaas.
Somalilandpost.net
contact@somalilandpost.net