Hargeysa, (SLpost)- Xildhibaannadii Golaha Deegaanka degmada Salaxley ugu jiray Xisbiga UCID iyo Masuuliyiinta heer degmo ee xisbigaas ayaa ku dhawaaqay inay iska casileen xilkii iyo xubninimadii xisbiga UCID.
Xildhibaannada Golaha Deegaanka Degmada Salaxley iyo masuuliyiinta here ee Xisbiga UCID ayaa shir jaraaid oo ay shalay ku qabteen Hotel Hadhwanaag ee magaalada Hargeysa ayaa ku shaaciyay inay ka baxeen xisbiga UCID, isla markaana ay uga diga rogteen urur siyaasadeedka Wadani oo dhawaan lagu dhawaaqay.
Waxa ugu horreyn shirkaa jaraa’id ka hadlay Gudoomiyihii Degmada Salaxley ee UCID Ismaaciil Aadan Carraale waxaanu daboolka ka qaaday inay iska casileen xubnimadii xisbiga UCID. “Aniga oo ah Gudoomiyaha degmada Salaxley ee xisbiga UCID, xildhibaanadii golaha deegaanka iyo xubnihii heer degmo ee xisbigaasi waxaanu halkan kaga dhawaaqaynaa inaanu iska casilnay xisbigii UCID.” ayuu yidhi Gudoomiyihii xisbiga UCID ee degmada Salaxlay Ismaaciil Aadan Carraale
Isagoo hadalkiisa sii watana waxa uu intaa ku daray “Ka dib markii uu noqday Xisbiga UCID mid fadhiid ah, waxa kale aanu halkan kaga dhawaaqaynaa inaanu si rasmiya ugu biirnay Urur Siyaasadeedka WADANI, oo hadda wixii ka dambeeya aanu ka mid nahay hiil iyo hooba aanu la garab taagan nahay”
Waxa isna halkaa ka hadlay Xidhibaan Axmed Aadan Ducaale oo ka mid ah Golaha Deegaanka degmada Salaxley ugu jiray Xisbiga UCID, waxaanu sheegay inay ka diga rogteen xisbigii UCID. “Waxaanu halkan ku muujinaynaa haddaanu nahay Mudanayaasha degmada Salaxlay inaanu ka soo diga roganay xisbigii UCID, isla markaana aanu u soo diga roganay Urur Siyaasadeedka WADANI, arrintaasna waxa nagu kalifay ka dib markii aanu in badan qayb ka soo ahayn xisbigii UCID, isla markaana wax horumar ah samayn waayey, waxaanu go’aansanay inaanu taageeradayada iyo xoogaygaba ku biirino ururka siyaasiga ah ee WADANi.” ayuu yidhi Xidhibaan Axmed Aadan Ducaale.
Waxa sidoo kale shirkaa jaraa’id ka hadlay Xildhibaan Axmed Ibraahim Cabdi. “Maanta waxaanu halkan u nimi si aanu u muujino dareenkaygii wadanimo, waxa maanta halkan ka cad in halkani tahay UCID oo magacii bedeshay, waayo masuuliyiinta Madaxdii, Xildhibaanadii iyo dadweynihii UCID maanta halkan ayay joogaan oo magacii ayuunbaa WADANI lagu bedelay, waxa kale oo aan halkan ka cadaynaynaa in odayaasha, haweenka dhalinyarada iyo waxgaradka degmadaasi ay soo dhaweynayaan ururka WADANI, qaybna ka yihiin, lana shaqaynayaan.” ayuu yidhi Xildhibaan Axmed Ibraahim Cabdi.
Waxa isna kulanka gabagebadiisa halka ka hadlay Gudoomiyaha garabka dhalinyarada ee degmada Salaxlay Maxamed Cismaan Xasan, isagoo sheegay inay xisbigii UCID ay la soo shaqaynayeen muddooyin badan ay iska casileen oo ay ku biireen xisbiga cusub ee WADANI, waxaanu yidhi. “Markii aanu aragnay xubnaha ku jira urur siyaasadeedka WADANI, waxaanu go’aansanay inaanu ku biirno xisbigaa, maadaamo xisbigii UCID ee aanu intaasoo dhan la soo halgamanay uu keeni waayay wax natiijo ah, markaa haddii aanu nahay dhalinyaradda degmada Salaxlay waxaanu si hagar la’aan ah ugu biirnay Wadani.” ayuu yidhi Maxamed Cismaan Xasan.
Magacyada Masuuliyiinta heer Degmo iyo Xildhibaannada Golaha Deegaanka Salaxley ee ka digarogtay Xisbiga UCID:
1- Ismaaciil Aadan Carraale
2- Axmed Aadan Ducaale
3- Axmed Ibraahim Cabdi
4- Cabdi Salaan Jibriil
5- Faysal Aadan Ibraahim
6- Maxamed Cismaan Xasan
7- Rashiid Cabdillaahi
8- Cabdiraxmaan Ismaaciil Aadan
Somalilandpost.net
Contact@somalilandpost.net