[H]argeysa (SLpost)- Xildhibaan Cabdiraxmaan Maxamed (Xoog), ayaa Shir-guddoonka Golaha Wakiillada ku eedeeyey inuu ku dhex-milmay golaha Xukuumadda isla markaana ka hadlay doorka mooggaananta Xukuumadda ee Dableydii dhawaan weerarka ku ekeysiiyey Xerada Ciidamada Qaranka ee Bariga Caasimadda Hargeysa.
Xildhibaan Cabdiraxmaan-xoog oo shalay qaar ka mid ah warbaahinta ugu waramayay Huteelka Imperial ee Magaalada Hargeysa, waxa uu ururada siyaasadda Somaliland ka sokow ka hadlay in aafada Soomaaliya haysataana ay tahay waxa loogu yeedho maamul-goboleed.Sidoo kalena Golaha uu ka tirsan yahay ee Wakiilada ayuu ku tilmaamay kuwo jeebka u galay Xukuumadda.“Somaliland maanta waxa lagu soo dhex-tuuray wax la yidhaahdo Ururo, Soomaaliyana waxa lagu soo dhex-tuuray maamul-goboleed oo waa aafo dadka lagu soo dhex-tuuray. Labadii wallaalaha ahaa iyo labadii isku Gobalka ahaa ayaa leh anaguna waxaanu nahay Urur hebel oo Lacagta inagaga baxaysaana aad ayey u badan tahay.Dadkiina tobankii bilood-ba waxa haysta haraad iyo Biyo la’aan, inaga oo doorashooyinkana ku bixinayna lacag aad u tiro badan. Markaa waxa wacan in lasameeyo sidii Biyahaasi loo qaban lahaa.” Ayuu yidhi Xildhibaan Xoog.Isaga oo hadalkiisa sii watana waxa uu yidhi, “Golihii iyo xukuumadii way isku milmeen oo waxa uu galay jeebka Xukuumada, waxaana ka masuulah shir-guddoonka. Waxa la keenay laba xeer oo uu ka mid yahay Xeerka Budh-cad baddeeda, iyada oo Baarlamaankii ka doodin ayaa markiiba la marsiiyay, markaa shirguddoonku waa inuu sidan wax ka bedelaa. Haddii xeer aad u samayso qof aad necebtahay, hadhaw waxa uu dabraa qof aad jeceshahay.”
“Xukuumadu siday u ogaan kariwayday inamada yar-yar ee weerarka ku soo qaadaya xerada Ciidanka intay waxan oo hubah urursanayeen ama ay ku jireen abaabulka maxay dawladu u ogaan kariwayday. Dawladu waxay leedahay meelo ay ka hesho sirta dalka ama ku shaqo leh oo CID-du waxa weeye inay la socoto dalka waxa ka jira, markaa waxa weeye CID-du waxay ka seexatay shaqadii ay qaranka u haysay oo aad ayay maanta u liitadaa sirdoonka dalku. Odayaal ayey leedahay nabada ka shaqeeya oo ay u dirilahayd.”Ayuu hadalkiisa raaciyay.
Xildhibaan Cabdiraxmaan Maxamed (Xoog) waxa uu intaasi ku daray, “Afartan Inan ee Ciidanka weeraray waxay ahayd sidii caadadu inoo ahayd in loo diro Odayaasha oo Inamadan yar-yar ee reer Miyiga ahaa la kala furfuro ayey ahayd oo laga hortago.May ahayn in ciddi ay inaga dhimato.May ahayn in Ciidanka qaranka la soo weeraro oo la laayo, kuwa kalena waa niman muwaadiniin ah oo reer Somaliland ah.Shacabka xukun Militari laguma qaado, Maxkamada Militarigu waxay gaar u tahay Ciidanka Militariga, immikana anigu waxaan leeyahay dembigaba ha lagu qaadee waa in loo wareejiyaa Maxkamada dembiyadda oo halkaasi lagu qaado dembigooda.”
Xildhibaan Cabdiraxmaan Maxamed (Xoog) waxa uu sidoo kale ka hadlay khilaafka hadheeyay Xisbiga UDUB, isaga oo taas ka hadlayayna waxa uu yidhi, “Anigu is-haysiga Xisbiga UDUB waan ka maqnaa, laakiin arrinka UDUB waxa uu isu-bedelay si ay ka muuqato qabyaalad fool xun. Waxaan ku talin lahaa in arrinka lagu dhameeyo wada-hadal, inkasta oo uu Maxkamada geeyay Axmed Yuusuf Yasiin oo Guddoomiye ku-xigeenku waa saxiibkay oo aad ayaan uga xumahay in lagu shaabadeeyo Nin reerkooda ah oo wata saddex boqol oo kun inuu keeno meesha, isaguna uu u arkaayay in lacagtii Xisbiga lagu hawl-galinayey inuu ninkani keenay oo UDUB ay burbur qarka u saaran tahay. Maaha inuu Xisbi qaran sidaasi u galo. Anigu Guddoomiyaha isku reer manihin ee waxaanu isku reer nahay Ninka kale ee ay isku haystaan xisbiga, aad ayaan uga xumahay inuu Guddoomiye ku xigeenku uu xisbigii ka iibiyey nin ay isku reer yihiin oo aad tidhaahdo xisbigii waxa iska leh ninka saddexda boqol ee kun bixiyey. Axmed Yuusuf Yasiin inuu halkaasi galo maan doonayn, waxaan qabaa in la joojiyo musharraxan iyo waxyaabahan yar-yar ee xisbigii uu siwacan isugu yimaado.”
SLpost News/Hargeysa