Hargeysa (SLpost)- Xildhibaan Maxamed Sheekh Cabdiraxmaan oo ka mid ah Xildhibaanadda Golaha Guurtida Somaliland ayaa si wayn u naqdiyey Siyaasadda Guddoomiyaha Xisbiga UCID Faysal Cali Waraabe, kaas oo uu uga digay inuu faraha ku sii adkaysto qaban-qaabadda shirkii uu ku tilmaamay talo-qaranka oo uu Xildhibaan Maxamed Sheekh C/raxmaan ku sifeeyey shir-beeleed aan wakhtigan ku haboonayn in bulshadda Somaliland dib loogu celiyo.
Xildhibaan Maxamed Sheekh Cabdiraxmaan oo ka mid ah Mudanayaasha ugu firfircoon Golaha Guurtida Somaliland ayaa waxa uu si wayn u soo dhaweeyey, isla markaana go’aan geesinimo ku tilmaamay hadalkii ka soo yeedhay Musharaxa Xisbiga UCID ee uu ku deedefeeyey Shirka uu Faysal Cali Waraabe hore ugu baaqay, kaas oo jawaabta Jamaal ku tilmaamay mid uu ka muuqdo Bisayl Siyaasadeed. Waxaanus sidaas ku sheegay Xildhibaanku War-saxaafadeed qoraal ah oo uu caawa ka soo saaray Magaaladda Hargeysa, kaas oo si qoto-dheer ugaga hadlay labada fikir ee labadaas masuul ee isku xisbiga ah, qoraalkaas oo dhamaystiranna waxa uu u dhignaa sidan:- “Waxaan soo dhawaynayaa hadalkii murrashaxiinta xisbiga UCID ku caddeeyeen mowqifka iyo siyaasadda xisbiga UCID ee waqtigan, taas oo ay tahay inay iyagu u jeexaan siyaasadda uu xisbigu ku shaqayn doono shanta sanno ee soo socda, waanan ku hambalyeynayaa arrintaasi.
Sidoo kale Faysal-na waxaannu leenahay ha noqon Waraabe ilkihiisana uma roona laf meel taalna uma roona, waayo haddii la eego xeerka ururrada iyo xisbiyada ee xeer Lr.14 qodobkisa 1 – 2 waxay si cad u tilmaamayaan inuu Faysal sidii uu ku waayey murrashaxnimada si la mid ah uu ku waayay Guddoomiyenimada xisbiga, sidaa darteed waa xubin sharaf, wax cod ah oo uu ku leeyahayna ma jirto. Waxaannan kula talin lahaa inuu xisbiga ka ilaaliyo marin habowga siyaasadeed.
Xukuumadda waxa habboon inay ka wada shaqeeyaan hoggaanka cusub ee xisbiga wixii qorshe ah ee looga baahdo xisbiga. Sidoo kale, Guddiga diiwaangelintana waa inay hoos u eegto xeerarka iyo dabagalka ururrada iyo xisbiyada.
Waxa ayaan-darro ah hadalka uu Faysal Cali Waraabe kaga jawaabay hadalkii murrashaxa Madaxweyne ee xisbiga UCID uu ku caddeeyey mowqifkiisa iyo siyaasadda xisbiga in aannu xisbiga UCID awoodihiisa ahayn, sharciyadda dalkana aanay siin awoodaha lagu qabto shir wadatashi Qaran ah, laakiin cidda ummaddu u dooratay ay tahay xukuumadda, iyaguse (xisbiga) ay ku kooban yihiin dhaliilaha xukuumaddu leedahay inay sheegaan, wixii wanaagsana ku taageeraan.
Haseyeeshee, hadalka Faysal uu siiyey wargeyska Geeska Afrika waxa uu u muuqdaa mid aannu ka fiirsi u odhan, waxaanay u muuqanaysaa in Faysal weli doonayo inuu madaxa kaga duubnaado hoggaanka xisbiga ee u sharraxan hoggaaminta dalka, taasina waxay keenaysaa ceeb”.
SOMALILANDPOST.NET