Ceerigaabo(SLpost)- Xildhibaan Qamar Maxamed Saalax (Qamar Talleex) oo ka mid ah Golaha deegaanka ee degmadda Ceerigaabo ayaa qaylo dhaan ka muujisay sun badda lagu daadiyay oo ka soo caariday xeebta gobolka Sanaag.
Xildhibaan Qamar oo shalay warbaahinta kula hadashay magaaladda Cerigaabo ayaa xukuumadda u soo jeedisay inay wax ka qabato sun ay u sheegtay in ay ka soo caariday xeebta gobolka Sanaag, gaar ahaan meesha la yidhaahdo Xarsho, waxaanay tidhi “Maanta (shalay) waxa aan u qabtay shir saxaafadeedkan waxa weeye dhibaato ka taagan, xeebta waqooyi ee gobolka Sanaag gaar ahaan meesha la yidhaahdo Xarsho oo waqooyi ka xigta qiyaastii 90km magaalada Ceerigaabo waxa ka soo baxday halkaa haan weyn oo dahaadhan. waxaanu u arragnay inay tahay waxyaabaha lagu aaso badaha mandaqadda waxaana keenay duufaantii dabaylaha wadatay ee ka dhacday xeebta.”
“Waxa aan baaq u dirayaa cid kasta oo ka damqanaysa dhibaatadaas halkaas ka taagan oo bulshadda waxyeelo ku haysa. xukuumadda Somaliland ha ahaato iyo ciddii kale ee danaynaysaba ha ahaato meeshaa aad ayaa loogu dhibaataysan yahay dad shicib ah ayaa gaadh ka haya si aanay bulshadda reer miyiga ah wax u yeelin suntaasi,”ayay tidhi Xildhibaan Qamar Talleex.
Waxa kale oo ay sheegtay inay kula xisaabtami doonaan dadkii suntan badda dhigay, waxaanay tidhi “Waxaanu codsanaynaa markaa in la soo eego suntaas oo meesha laga qaado, waxaana ku adkaynayaa xukuumadda Somaliland inay dedaal badan gasho arrintaas waayo dadku waa dadkeedii oo iyadaa ka masuula. Waanan kula xisaabtamaynaa dadkii suntaas meesha dhigay goor ay noqotaba.”
Somalilandpost.net
Hargeysa, Somaliland