Hargeysa (SLpost)- Wasiir Ku xigeenka wasaaradda Warfaafinta iyo wacyigelinta Somaliland Mudane Cabdilaahi Maxamed Daahir (Cukuse) ayaa saxaafada dalka ku booriyay inay ilaaliyaan sharciyadda dalka si ay u abuurtaan deegaan ay ka dhex shaqayn karaan. Waxaanu tilmaamay inaanay Saxaafaddu ka dhex shaqayn Karin meel aanu sharci ka jirin oo qorigu ka talliyo.
Wasiir Ku xigeenku waxa uu sidaasi ka sheegay Tababar uu soo qaban qaabiyay Akaadamiga Nabadda iyo Horumarka oo sadex maalmood ah ka socday Huteelka Ambassador ee Magaaladda Hargeysa oo lagu kala saxeexday xeerka anshaxa saxaafadda.
Md. Cabdilaahi Cukuse waxa uu tallooyin u soo jeediyay qeybaha kala duwan ee saxaafadda Somaliland, isagoo arrintaasi ka hadlayayna waxa uu yidhi “Bini’aadmigu haddii uu dabar waayo sida awrka ayuu lumayaa, bini’aadmiguna waa inuu dabar yeeshaa waa in iimaankiisa iyo caqiidadiisa, dhaqankiisa iyo damiirkiisu xidhaa. Saxaafad xor ahi waxay u baahan tahay bulsho xor ah, bulsho xor ahina waa meel ay kala dambayni jirto, waana meel aan qorigu tallinaynin, waana meel aan la kala xoog weynayn.”
“Meesha sharcigu sareeyo ayay ka dhex shaqayn karaysaa saxaafadda xorta ahi,Iyadu markaa inay taas ilaaliso oo xoojiso ayaa looga baahan yahay si ay u abuurato deegaankii ay ka dhex shaqayn lahayd. Meel qorigu taliyo makarafoonkan iyo rikoodhkan yar ee aad sidataan kama shaqeeyo,”ayuu yidhi Wasiir Ku xigeenka Warfaafintu.
Wasiir Ku xigeenku waxa uu ku booriyay Saxaafadda inay ku dedaasho sidii ay sharciga u dhawri lahayd, isagoo arrintaasi ka hadlayayna waxa uu yidhi “Markaa waxay ila tahay Saxaafadda ayay sharciga dani ugu jirtaa ee waa inaynu innagu ilaashano. Annagu xukuumad ahaan waxaanu idiin balan qaadaynaa intiina halkan iskugu timid (Saxaafadda) haddii aad isku timaadaan oo aad xeerka anshaxa (Code of Conduct) samaysataan, waanu idinla saxeexaynaaye’ dhinacayaga (Xukuumadda) wuu ka fulayaaye ee dhinaciina ha ka fulo. Isaga uun baanu idinku xukumaynaa ee berito yuu qadhaadhaanin oo hadhowto yaynaan ku murmin.imka wuu macaan yahaye’ berina ha macaanaado. Sharciga ka maarmi maynu ee aynu ilaashano.”
“Meel bilaa sharci ah kuma noolaanayno oo waa xaaraam calayk, qofkii moodaya meel bilaa sharci ah inuu ku noolaado ka yeeli mayno, wax inoo dhaxeeya oo idinka (saxaafadda) iyo bulashadana u dhaxeeya ayaa khasab ah inuu jiro,”ayuu yidhi Md. Cabdilaahi Maxamed Daahir
somalilandpost.net