Dugsiyada Dhexe ee Ileys oo lix arday ku yeeshay 20-ka arday ee ugu sarreeyey dalka oo dhan
Hargeysa (SLpost)- Xaflad lagu fooladaynayey ardayda wax ka barta dugsiyada hoose/dhexe gaarka loo leeyahay ILAYS oo ka mid noqday 20-ka arday ee ugu sarreeyey imtixaanka shahaadiga sannad-dugsiyeedka 2013/2014 ee dugsiyada dhexe ee dalka Jamhuuriyadda Somaliland oo lagu dhawaaqay shalay, ayaa lagu qabtay hudheelka Hadhwanaag ee magaalada Hargeysa xalay.
Xafaddan oo ay wadajir u soo qabanqaabiyeen maamulayaasha dugsiyada hoose dhexe ee ILAYS oo ku kala yaal daafaha caasimadda Hargeysa, waxa ka qaybgalay maamulka, macallimiinta iyo waalidiinta guusha weyn ka soo hooyey imtixaanaadka.
Ardeyda wax ka barta dugsiga hoose dhexe ee Ilays qaybihiisa New Hargeysa iyo Calaamadaha (Ilays Imaamu shaafici), ayaa wacdaro ka muujiyey natiijada imtixaanaadka shahaadiga dugsiyada dhex ee dalka, kadib markii ay ku guuleysteen kaalinta kowaad iyo shan kaalmood oo kale labaatanka arday ee Somaliland oo dhan ugu sarreeyey.
Maamulaha Dugsiga Hoose/dhexe Ilays ee xaafadda New Hargeysa Mr. Maxamed Xuseen Muuse oo ugu horreyn munaasibaddaas ka hadlay, ayaa ku dheeraaday dedaalka weyn ee ay u galeen kor u qaadista tayada iyo waxbarashad ardeyda, “Marka kowaad waxaan u mahad-naqayaa Ilaahay, marka xigana macallimiinta hawsha dhinac ila qabtay, waaliidiinta iyo ardeyda laftooda. Waxaan sidoo kale aad ugu mahad-celinayaa Wasaaradda Waxbarashada iyo Tacliinta Sare ee Somaliland, gaar ahaan Xafiiska Imtixaanaadka Qaranka gaar ahaan xafiiska imtixanadka” ayuu yidhi maamuluhu.
Sidoo kale, waxa munaasibaddaas ka hadlay Maamulaha Dugsiga Ilays ee Calaamadaha Mr. Cismaan Xaaji iyo sarkaal ka tirsan kormeerayaasha waxbarashada ee hay’dda Masno oo dhammaan dugsiyada Ilays hoos tagaan.
Ardayga kaalinta koowaad ka imtixaanka shahaadiga dugsiyada dhexe ee Jamhuuriyadda Somaliland Mr. Maxamuud Xuseen Warsame, ayaa isaguna tilmaamay dareenkiisa iyo sida uu ugu faraxsan yahay guusha uu u soo hooyey natfiitsa, dugsigiisa iyo dhammaan qaybaha kala duwan ee dugsiyada Ilays.
Waa sannadkii saddexaad ee ardayda dugsiyada dhexe iyo sare ee Ilays si xidhiidh ah ugu guulaystaan kaalmaha ugu sarreeya imtixaannaadka shahaadiga ah ee dugsiyada dalka Somaliland.
Gebagebadii munaasibadda waxa shahaado-sharafyo gaar ah lagu maamuusay lixda arday ee guusha taariikhiga ah ka soo hooyey imtixaannaadka qaranka iyo waalidiintooda.
Halkan Hoose ka Daawo Maamulaha Dugsiga Dhexe ee Iley Primary School, New Hargeysa, Maxamed Xuseen oo ka dareen-celinaya guusha ay ka gaadheen natiijada Imtixaannaadka Fasallada 8aad ee Dugsiyada Hoose/Dhexe.
SOMALILANDPOST.NET