Bulaxaar(SLpost)- Dr. Maxamed Aw Daahir Ibraahim, Wasiirka Wasaaradda Beeraha ayaa jimcihii shallay ka beeray degmada Buluxaar Geedka Timirta oo ay Lixdameeye Sano ka mid ahayd Goobaha ku caanka ah ee laga quuto.
Wefti uu hogaaminayo Wasiirka Beeraha Dr. Maxamed Aw Daahir Ibraahim ayaa beeritaanka Timirtan goob joog ka ahaa hadalo kala duwan oo muhiimada timirta ah ka jeediyey, waxaana Weftiga ka mid ahaa Wasiirka Caddaalada Somaliland Axmed Faarax Cadare, Agaasimaha guud ee Wasaaradda Beeraha Cabdilaahi Ismaaciil Faarax iyo Guddoomiyaha Degmada Buluxaar.
Wasiirka wasaaradda Beeraha Dr. Maxamed Aw Daahir Oo hadal kooban halkaasi ka jeediyey ayaa waxa uu tilmaamay muhiimada timirtu leedahay isaga oo sheegay inuu rajaynayo in Carwooyinka iyo tukaanada Somaliland dib looga helo Timirta deegaankan laga beeray.
Wasiirka Wasaaradda Beeraha oo arrimahaasi ka hadlaya ayaa waxa uu yidhi “Maanta waxa aynu halkan ku beernay geedkii Timirta oo aynu ka beernay goob la yidhi 1946 ayaa Ingiriisku timirta ka bilaabay, Timirtaa waxaan u garaadaystay tiiyoo la yidhaahdo Buluxaar bay ka baxdaa”.
Wasiirka ayaa waxa uu intaa ku daray isaga oo ka hadlaya rajadiisa uu ka qabo timirtan ay beereen “Insha Allah waxaan rajaynayaa Carwooyinka Somaliland iyo tukaanada iyada oo Timirtii Buluxaar ka timid lagu iibinayo inaynu aragno mustaqbalka dhow”
Agaasimaha guud ee wasaaradda Beeraha Cabdilaahi Ismaaciil Faarax ayaa isna dadka deegaanka kula dardaarmay inay ilaashadaan timirtaasi loo beeray, waxaanu yidhi isaga oo arrimahaasi ka hadlaya “Waxaan rajaynayaa inaanay halkani noqon mar dambe in meel wixii la siiyaa ay dabar go’aan sida timirihii hore oo kale”.
Wasiirka Cadaalada Somaliland Axmed Faarax Cadare oo isaguna halkaasi ka hadlay ayaa waxa uu yidhi “Dhulkani waxa uu ahaa dhulkii Timirta lagu abqaalay ee ugu horeeyey dalkii la isku odhan jiray Somalia, waxaan maanta nasiib u yeeshay mar kale inaan goob joog u ahaado Timirtii oo mar kale la abqaalayo, waxaanan xusuustaa in beertan maanta dib loogu abqaalayo aan ka cuni jiray Timirtii Khaliifta la odhan jiray ee ah ta safarada loo qaato, aadbaanu u mahadsan yahay Wasiirka Beeruhu oo ilaa 130 Geed Timireed ah maanta lagu abqaalayo Lughaya”
Guddoomiyaha Degmada Buluxaar oo isna halkaasi ka hadlay ayaa yidhi “Anigu waxaan ku ababay Timirtan wakhti aan ku jiray Dugsiga Hoose Dhexe, aad iyo aad ayaad u mahadsan tihiin waxaanan rajaynayaa inay Timirtan aynu beernay ay noqoto mid midho dhal ah oo dadka iyo dalkaba anfacda”