Hargeysa (SLpost)- Wasiirka wasaarada maaliyadda Mud, Cabdicasiis Maxamed Samaale oo ay weheliyaan Wasiiradda Warfaafinta Mud. Cabdi Yusuf Ducaale, Kalluumaysiga Md. Cabdilaahi Jaamac Cismaan (Geel-jire) Ciyaaraha Md. Cali Siciid Raygal iyo wasiir ku xigeenka wasaarada waxbarashada Mudane Cali Xaamud Jibriil ayaa maanta furay Carwada farsamada gacanta oo lagu soo bandhigay Hoolka Hay’adda shaqaalaha Dawladda ee Hargeysa.
Waxa ugu horayn furitaankii Carwadan ka hadlay wasiirka kaluumaysiga Cabdilahi Jaamac Cismaan,waxaanu sheegay in ay far-xad weyn leedahay in dhalinyarada Somaliland ay soo bandhigaan carwadan farsamada gacanta.isaga oo wasiirku xusay in ay carwadani tahay mid keenaysa isku kalsoonaan iyo wax-wada qabsi bulshada Somaliland dhexdeeda ah, isagoo intaas ku daray in haddii dhalinyarada la baro farsamooyinka gacanta ay keenayso horumar la taaban karo in lagu talaabsado.
Wasiir ku xigeenka wasaarada wax-barashada iyo Tacliinta Sare Cali xaamud Jibriil oo isna halkaasi ka hadlay, ayaa waxa uu sheegay in ay xoojinayaan wax-barashada dugsiyada farsamada gacanta ee Hargaysa iyo Burco.
Wasiirka wasaarada maaliyadda Mud, C/casiis Maxamed Samaale, oo si rasmi ah xadhiga uga jaray carwadaasi ayaa sheegay in wax soo saarka dalkeena in sidan oo kale loo soo bandhigo ay ah-miyad weyn leedahay,waxaanuu u mahad celiyey Hay’ada SAVE The Children .isagoo tilmaamay in wax- soo saarka farsamada gacanta ay yihiin tabaha keena horuumarka bulsho, taasoo ay hormuud u yihiin aqoon yahanada wax-bartay.
Waxaa kale oo madashii furitaanka Carwadan ka hadlay Qaar ka mid ah Ganacsatada dalka oo tilmaamay In horumarka dalka ka jiraa uu yahay ka suurto galiyay in carwo noocan oo kale ah lagu qabto Somaliland .
Dhinaca kale waxaa carwadan garab socotay mid kale oo lagu soo bandhigayay agabka hidaha iyo dhaqanka u ah bulshadeena sida cawsaska aqal soomaaliga laga sameeyo iyo ashyaa’da loo adeegsan jiray cuntada, oo ay soo diyaariyeen Ururka Dhaqanka ee Tawfiiq.
SLpost News/Hargeysa