Hargeysa (SLpost)- Wasiirka Madaxtooyadda Somaliland Md. Xirsi Cali X. Xasan, ayaa markii u horeysay ummadda u soo bandhigay aflagaaddo ay telefoonkiisa ugu soo dirtay gabadh lagu magacaabo Nadra Maxamed Jaamac oo wakhtigan u xidhan kiiska arrintaas la xidhiidha.
Md Xirsi oo maanta ka hadlay munaasibad loo sameeyey soo-dhawayn Xisbiga Kulmiye u sameeyey urur-siyaasadeedkii doorashada ku hadhay ee DALSAN, waxa uu sheegay in gabadhaasi u dirtay farriin fool-xum oo aan habboonayn in afka laga sheego, waxaanu yidhi isaga oo ka hadlaya, “Waxaan jecelahay inaan kalmad ka idhaahdo arrin laga yaabo in reer KULMIYE in badan I soo weydiisay oo ahayd, inan xabsiga ku xidhan oo la tilmaamo inay xaq-darro ku xidhan tahay, waanan tilmaamayaa. Waa sax cidii I soo weydiisay iyo cida laga yaabo inay is weydiiso maxaa loo xidhay iyo in Qofka xidhan xuquuqul insaanka iyo bulshaba loo wada doodo oo la yidhaahdo qofkaasi ma dambi baa lagu xidhay mise sax baa lagu xidhay.
Inantaasi waxay soo dirtay oo naga soo gaadhay fariin fawaaxish ah oo aad u fool xun oo aan ahayn mid aan halkan idiinka sheegi karo, ama dhegihiinu maqli karaan. Laakiin qofkii u baahan qoraal ayay ku taallaa farriintii Hay’adaha garsoorka iyo xuquuqul insaanka. Cidii u baahan arrintaasi xogteeda waanu u dhiibaynaa. Laakiin waa arrin aad u fool xun oo aanan afka kaga dhiiran gelin inaan halkan idiinka sheego. Waana wax aniga wax iga sheegaya, oo madaxweynaha wax ka sheegaya oo marwadda wax ka sheegaya oo masuuliyiinta kale ee qaranka wax ka sheegaya.”
Wasiirku waxa uu sheegay in cayda inantaasi ay telefonkeeda uga soo dirtay ay ahayd mid aad u fool xun, “Caydani waa mid laf-jab ah oo cirdiga iyo qoyska madaxweynaha iyo kayga wax ka sheegaysa, markaa ma doonayo inaan intaasi dhaafiyo. Waxaan leeyahay markaa waxa laga hadlay saxaafadda waxa lagu soo qoray warar badan oo odhanaya waa la dulmay, iyadoo aan la sugin garsoorkii. Waan maqnaa markii la qabtay inanta. Waxaanse imid iyadoo dadka la geliyay in inantaas dulmi lagu xidhay. Ma jiro dul inantaas lagu xidhay. Aniguna masuul ahaan waan iska ilaaliyay in saxaafadda ka hadlo si aan loo odhan Wasiirku wuxuu majaro habaabiyay xukunkii dhacayay oo aan filayo in lagu dhawaaqo waxa uu doono ha noqdee,” ayuu yidhi Md Xirsi, waxaanu intaas ku daray hadalkiisa, “Jeelasha waxaynu u samaysanay qofka edaabta daran in lagu edbiyo, sharcigana waxaynu u samaysanay in qofkii khaldan lagu qabto.”
SOMALILANDPOST.NET