Balligubadle/Faraweyne (SLpost)- Wasiirka Wasaaradda Horumarinta Maaliyadda ee Somaliland Dr. Sacad Cali Shire, ayaa kormeer shaqo maray Waaxaha Cashuuraha Berriga iyo Dakhli-ururinta degmooyinka Balligubadle ee gobolka Hawd ee Faraweyne oo ka tirsan gobolka Maroodijeex.
Wasiirka Wasaaradda Horumarinta Maaliyadda Dr. Sacad Cali Shire oo ay weheliyaan saraakiil ka tirsan wasaaradda, ayaa markii ay ka soo laabteen deegaanka Ina-Guuxaa ee degmada Saylac, waxa ay kormeerkooda ka bilaabeen magaalada Balligubadle ee xarunta Gobolka Hawd, waxaana xarunta maamulka ee gobolka ku soo dhaweeyey masuuliyiinta heer gobol iyo heer degmo oo ay weheliyeen xildhibaanno isugu jira kuwa golaha Wakiillada iyo Golaha deegaanka Balligubadle.
Wasiir Sacad Cali Shire waxa uu kormeer ku maray Xarunta Kastamka Cashuuraha ee magaalada Balligubadle, waxaanu wasiirku warbixin ku saabsan hawlaha shaqo ee Kastamka ka dhegaystay maamulka waaxda cashuuraha Berriga iyo Kastamka magaalada Balligubadle oo sharraxaad ka bixiyey dedaallada ay ugu jiraan dakhli-ururinta iyo dib-u-habayn lagu sameeyey dhismaha Kastamka Cashuuraha Balligubadle.
Kormeerka kaddib, waxa uu Wasiirku kulan ballaadhan la qaatay Masuuliyiinta Maamulka gobolka Hawd, degmada Balligubadle iyo xildhibaannada Golaha wakiillada iyo xarunta gobolka Hawd
Sidoo kale, Wasiirka Horumarinta Maaliyadda ee Somaliland waxa uu kormeer indho-indhayn ah ku tagay Kastamka degmada xuduudka Ethiopia ku taalla ee Faraweyne waxaanu wasiirku u-kuur-gelis ku sameeyey hab-sami u socodka hawlaha shaqo ee Kastamka.
Wasiirka Wasaaradda Horumarinta Maaliyadda oo socdaalka kormeerka ah ay ku wehelinayeen Agaasime-waaxeedyada Kastamada iyo Xidhiidhka dadweynaha ee Wasaaradda iyo saraakiil kale, waxa uu Md Sacad Cali Shire xadhigga ka jaray dhismaha cusub ee Kastamka Faraweyne oo dib-u-habayn iyo Casriyeyn lagu sameeyey.
“Waxa laydinka baahan yahay inaad ka shaqaysaan sidii loo dabar-jari lahaa Kontarabaanka iyo cid kasta oo lacag cashuureed kala baxsanaysa kastamka,” Sidaas ayuu yidhi Wasiir Sacad Cali oo intaas ku daray inuu hadhsan yahay weji labaad oo lagu ballaadhinayo dhismaha kastamka Faraweyne.
Kormeerka Wasiirka Maaliyaddu ku maray xarumaha dakhli-ururinta Wasaaradda ee ku yaalla deegaannada ku taxan xuduudka, ayaa qayb ka ah dedaallo ay wasaaraddu ugu jirto la-dagaalanka xatooyada Cashuuraha ama Badeecadaha sida qarsoodiga ah loo soo geliyo dalka.
Kastamada Cashuuraha ee Wasaaradda Maaliyadda, ayaa qayb laxaad leh ka qaata hannaanka dakhli-ururinta ee Xukuumadda, waxaanay laf-dhabar u yihiin koboca dhaqaale ee dowliga ah.
Somalilandpost.net
contact@somalilandpost.net