Hargeysa, (SLP)- Wasiirka Wasaarada hawlaha guud Cabdirisaaq Khaliif Axmed, ayaa sheegay in Wasaarad ahaaan ay aqbaleen go’aankii Golaha Wakiiladu ku laalay lacagtii lagu hubinayay tayadda gaadiidka dekadda ka soo dega, waxaanu ku dooday inay sidaasi u yeeleen iyagoo tixgelinaya sharciyadda.
Wasiirka oo maanta warbaahinta kula hadlay xafiiskiisa waxa kale oo uu Guddoomiyaha Golaha Wakiilada ku eedeeyay in sifo baal baarsan sharciyada cod ugu qaaday xeerkan, islamarkaana aanu la taliye sharci u dirin.
“Baarlamaanku waxa uu soo saaray go’aan ah in la laalay takaaliiftii laga qaadi jiray Gaadiidka soo degaya ee lagu hubinayay tayadooda, waxaan idin sheegayaa arrinta baadhitaanka iyo Gaadiidka bad-qabkoodu waa arrin sharci ah, kana mid ah xeerarka dalka ee la ansixiyay, xeerka waddo marista qoddobkiisa 47-aad wuxuu jidaynayaa in la baadho bad-qabka Gaadiidka sannadkiiba mar iyo markii kale ee ay baahiyi keentaba iyo marka uu u arko Wasiirka hawshan u xil saaran xeernidaamiye ku soo saaro labadaba.
Waxa laga hadlayay ee hawshu ka dhalatay waxay ahayd takaaliifta oo Baarlamaanku u arkayay in iyaga ay soo marto oo annaguna u arkaynay adeeg aanu qabanayno oo ah in dadka laga qaado takaaliif oo aanay u baahnayn inay marto Baarlamaanka, waad ogaydeen markii ay soo cawdeen Ganacsatada gaadiidka soo dejiyaa, waxaanu isku daynay in aanu qancino dhalinyarradii hawshaa waday oo kumay qanicin. waxaannu u soo jeedinay oo waxay u tageen Guddida dhaqaalaha Golaha Wakiilada annagana way noo yimaadeen. Waad ogaydeenoo Guddida dhaqaaluhu shir jaraa’id bay qabteen, waxaanay sheegeen inay arrintaasi sharci tahay,”ayuu yidhi Wasiir Cabdirisaaq Khaliif.
Wasiirku waxa uu Guddoomiye Cirro ku eedeeyay inuu sifo xeer hoosaadkooda ka dhan ah mooshinkaas Golaha u horkeenay, waxaannu yidhi “Waxa dhacday in la sameeyay Mooshin hawshaa ka dhan ah oo shalay Golaha Wakiilada la keenay, Guddoomiyaha Golaha Wakiilada aniga oo ixtiraamaya oo masuuliyiinta qaranka ka mid ah, guddidii dhaqaalahana isaga oo aan dhagaysan oo aan qaybin xeerkii, la taliye sharci aan u dirin wakhtigii xeer-hoosaadkoodu qorayay ee ahayd 24 saacadood aan siinin ayuu u cod u qaaday arrintaa ayna sheegeen inay takaaliiftaa laaleen, annagu kumaannu qanacsanayn qaabka ay sharciga u mareen iyo sida ay u arkaan labadaba waanu ku kala aragti duwanayn.”
“Annaga oo ixtiraamayna hay’addaha sharciga laalistaa takaaliifta sida ay ahayd baanu u qaadanay Wasaaradd ahaan, waxaanay u dhaqan-galaysaa sidii ay ahayd oo wax takaaliif ah laga qaadayo Gadiidku ma jiri doonto. Waxaanu is leenahay Guddoomiyuhu haddii uu gefay oo uu mari kari waayay sharcigii laydh baa ku taagaanoo meelo kale ayuu culays ka haystaa, markaa annagu odaygaa Ardaaga horfadhiya go’aanka Golaha sidii ay u ansixiyeen ayaannu u qaadanay, laakiin hawshii baadhista Gaadiidku sideedii ayay u soconaysaa,”ayuu ku doodiisa ku soo gabogabeeyay Wasiirka hawlaha Guud.
Somalilandpost
Hargeisa Office