Hargeysa (SLpost) – Wasiirka Wasaaradda Arrimaha Gudaha Somaliland Maxamed Nuur Carraale (Duur) ayaa hanjabaad weyn u jeediyey ururrada siyaasadda ee ku hadhay Qiimaynta isla markaana uga digay in ay qabtan mudaharaad ay sheegeen inay cabashooyinkooda ku muujinayaan kuwaas oo ay shalay taageerayaashooda ugu baaqeen.
Wasiir Duur waxa uu hoggaamiyeyaasha ururrada hadhay ku eedeeyay inay ku mashquulsan yihiin ficillo ammaanka waxyeellaynaya isla markaana baal-marsan sharciga isaga oo ku dhaliilay inaanay marin tubta sharciga ah ee garsoorka.
Wasiirka oo shir jaraa’id ku qabtay xafiiskiisa Magaalada Hargeysa waxa uu sheegay in xukuumadda aanay u dul qaadan doonin in ururadii hadhay ay dhigaan mudaharaadyo, iyada oo laga hortagi doono tallaabao kasta oo lagu abuurayo xasarado saamayn ku yeesha amniga magaalooyinka waaweyn ee dalka.
“Qofka aan Qarankaba ku kalsoonayn, garsoorka ku kalsoonayn ee aan guddi ku kalsoonayn, sharci ku kalsoonayn isagu ha qanco, intaa qofka aan ku kalsoonayn ee aan intaaba aaminsanayn, isagu tallaabada uu qaadayo xorbuu yahay, waayo ninka maanta leh Somaliland dawladi ma jirto waxa la tusayaa oo kaliya in ay dawlad jirto oo kala dambayni jirto oo maamul jiro, ma banaana xoog ayaan urur ku samaynsanayaa oo shaciga ayaan baalmarayaa, ma banaana buuq iyo qalalaase, ma banaana in nabada ummadani haysto laga burburiyo, anagu intaasaanu ilaalinaynaa,” ayuu yidhi wasiir Duur.
Waxa uu wasiirku sheegay in xaaladda siyaasadeed ee dalka ka jirta aanay waxyeello gaadhsiin Karin nabad-gelyada dalka, “Waxaana cadaynaa dhicimayso in ummada qas la geliyo, waayo horaan u idhi Somaliland labaatankaa sannadood wixii dhismayay ayaa dhismay oo nabada qalbiga ummadday ku jirtaa, awoodda ummadday ku jirtaa, ciidamo amniga dhawrana way leedahay Somaliland qof sidii Quraarad yar oo jabaysa qof uu gacantiisa ku burburiyo”.
Digniinta iyo Hanjabaadaha Wasiir Duur ayaa ku soo beegmaya wakhti ururrada siyaasadda ee qiimaynta ku hadhay ay isku dayeyaan inay abaabulaan mudaharaadyo salmi ah oo ay cabashadooda ku soo bandhigayaan.
Hoggaamada todoba ka mid ah urur-siyaasadeedyada hadhay ayaa shalay taageerayaashooda ugu baaqay inay ka soo qayb-galaan isu-soo-baxyo salmi ah oo ay dalkoo dhan ka dhigayaan, iyaga oo maanta u ballansanaa inuu mudaharaadyadaasi ka dhacaan caasimadda Hargeysa, waxaanu uu baaqoodu noqday mid fashilmay, haseyeeshee, taageerayaasha ururrada hadhay qaarkood ayaa maanta isu-soo-bax ka sameeyey magaalooyinka Berbera iyo Burco.
SOMALILANDPOST.NET
webmaster@somalilandpost.net