Hargeysa (SLpost) – Wasiirka Arrimaha Gudaha Somaliland Cali Maxamed Waran-cadde, ayaa si adag uga hadlay shir beeleedka xisbiyada Mucaaradka ahi qaban-qaabinayaan, waxaanu sheegay in shirkaasi dhibaato ammaan darro dalka ka abuuri karo.
Wasiirka Wasaaradda Arrimaha gudaha Somaliland, oo maanta shir jaraa’id ku qabtay Xafiiskiisa Hargeysa, ayaa sheegay in aanay dawladdu ogolaanaynin in dalka lagu qabto wax sharciga iyo dastuurka dalka u yaala khilaafsan.
Wasiirka oo ka hadlaya dedaalo Dawladda Xamar ku doonayso inay khalkhal kaga abuurto Somaliland, ayaa yidhi “Cadawga Somaliland ay leedahay ee ugu horeyaa waa Dawlada Soomaaliya ka dhisan, waxay wadaan, gaar ahaan Madaxweynahoodu in ay Somaliland ka dhex abuuraan fad-qalalo siyaasadeed oo deganaansho la’aaneed, sidaasi awgeed, waxay dalka gudihiisa ka dhex abuurayaan Kooxo reer Somaliland ah oo ay duufsadeen, balse aanaan garanayn sababta ay u duufsadeen, kuwaasi oo ay doonayaan ay sidda Soomaaliya oo kale dalkeena ka dhigaan, oo ay ka dhex abuuraan muran siyaasadeed, waayo dalka Soomaaliya halkaasi waxa gaadhsiiyey muran siyaasadeed iyo mid madaxnimo, in taasi oo kale ay dalka laga abuurayo ayaanu caddeyn ku haynaa oo waliba lagu bixiyey hanti faro badan.”
Wasiirka Arrimaha gudaha Somaliland waxa kale oo uu intaa ku daray “Tallo badan ayaa lagu bixiyey, si dadka reer Somaliland la iskaga horkeeno si degenaansho la’aan looga dhex abuuro, innagu waxaynu sameysnay si arrimahasi uga baxsano nidaam iyo dastuur iyo sharci, markaa haddii sharcigaasi laga gudbo waxa u suurto galaysa dadka cadawga wakiilka u ah inay ku guulsaytaan inay Somaliland ay la mid noqoto Soomaaliya, laakiin ILLAAHAY ayeynu taasi ka hoos galnay innaguna waxaynu nahay dad soo jeeda.”
Cali Maxamed Waran-cadde waxa kale oo uu sheegay “Beryahan dambe waxaan maqlayey arrimo aan dalkeena dhaqan u ahayn, oo ah in nidaamkii dawladnimo inta laga booday la yidhaahdo waxa la qabanayaa shirweyne Qaran ee ha la isugu yimaado, laakiin anigu arrintaasi waxaan u arkaa inay horseed u tahay in dalkan laga abuurro fadqalalo oo cadawgu u maleego dibin-daabyo, waxaan leeyahay dadka leh maalin heblaayo ayaanu fawdo qabanaynaa ama maalin heblaayo ayaanu shir qabanaynaa ama tallo qaran, waxaan leeyahay arrimaha aad wadaan waxay horseed u tahay Fawdo, fawdadaasina waxay ku koobnaan doonta cida ka masuul ah ee ku kacday, dawladuna iyadaa u xil-saaran in cid kasta oo fawdo iyo sharci jabin ka wada in ay ka qabto xil kasta oo uu hayo”
Somalilandpost.net
Hargaysa