Hargeysa (SLpost)- Wasiirka Wasaaradda Deegaanka Somaliland Marwo Shukri X. Ismaaciil Baandare, ayaa markii ugu horeysay tan iyo markii xilkaas loo magacaabay, xog-waraysi ay warbaahinta siisay kaga hadashay xaaladda Deegaanka Dalku ku sugan yahay iyo Caqabado halis ku ah caafimaad-qabkiisa.
Marwo Shukri X. Ismaaciil oo shalay warbaahinta Dawladda ugu warrantay xafiiskeeda, waxa ay ka deyrisay isbeddelka iyo saamaynta ku timaadda deegaanka xilliyada roobka oo ay ku samaysmaan Jeex-jeexyo ka dhasha daadka xilli-roobaadka, kuwaas oo waxyeelo gaadhsiiya dalagyada, waddooyinka iyo noolayaasha jiritaankoodu ku tiirsanyahay deegaanka.
Marwo Shukri waxa ay sheegtay in muddo dheer ay jirtay dhibaatada ay sababaan jeex-jeexyada gaar ahaan waxyeelooyinka ay u leeyihiin qaybaha nolosha bulshada sida beeraha, xoolaha iyo bilicda magaalooyinka, iyaga oo ay biyo-roobaadku si degdeg ah u raacaan jeexjeexyada iyo laagaha aan haboonayn, kuwaas oo ay xustay inay hoos u dhigaan dalag-cawseedkii ka soo bixi lahaa dhulka badankiisa isla markaana khatar gelisa dhismayaasha ay dadku ku nool yihiin ee magaalooyinka.
Wasiiradda Deegaanku waxa ay sheegtay in hadii aan wax laga qaban biyaha rogmanaya ay maalinba ta xigta sii kordhi doonto dhibaato horseedda nabaad-guur dhulka ku yimaadda, waxaanay sheegay inay wasaarad ahaa ku talo jiraan inay si deg-deg ah tallaabo uga qaadaan arrimahaas.
Wasiirka Deegaanku waxa ay tilmaantay halis adag oo ka jirta iyo kuwo ku soo fool leh Caafimaad-qabka Deegaanka Somaliland, taas oo xalkeeda ay ku sheegtay in lagaga bixi karo bulshada Somaliland oo fahamta lahaanshaha dhulkooda deegaanka, faa’iidooyinka uu u leeyahay iyo in noloshoodu ku xidhan tahay, isla markaana la joojiyo dhulka la deegaamaynayo ee tuulooyinka cusub laga samaynayo.
SOMALILANDPOST.INFO