Hargeysa (SLpost)- Wasiirkada Wasarada Warfaafinta Dhaqanka Iyo Wacyigalinta Somaliland Mudane Abiib Diiriye nuur ayaa shalay Si Rasmi ah Ula wareegay Waaxda Dhaqanka oo Horay Uga Tirsanayd wasarada Dhalinyara Iyo Ciyaaraha.
Xaflad shaqaalaha iyo maamulka Waaxda dhaqanka loogu wareejinayay wasaaradda warfaafinta oo lagu qabtay Huteel Maansoor, waxa ugu horayn ka hadlay wasiirka wasaarada ciyaaraha iyo dhalinyarada Md Cali siciid Raygal, waxaanu sheegay in tirada waaxda dhaqanka ee ay ku wareejinayaan wasaarada warfaafinta afar iyo sideetan qof oo isugu jira Maamul, Abwaaniin, Heesaa, Jilaa, Muyuusishan, ilaaliyayaal iyo Darawaliin.
Wasiirku waxa uu tilmaamay inuu ku faraxsan yahay in uu Fanaantii Qaranka ku wareejiyo halkii ku haboonayd ee ay hawshooda ku gudanayeen, Waxaanuu xusay in fanaaniintu ay yihiin Astaantii Qaranka isla markaana ay dhawrsoonaan gooni ah leeyihiin.
Wasiirka Warfaafinta Dhaqanka iyo Wacyi-gelinta Md Abiib Diiriye Nuur, oo isna halkaasi ka hadlay ayaa waxa uu sheegay in Bah’da Fanku ay kaalin Mug leh ka soo qaateen halgamadii kala duwanaa ee dalkani soo Maray,Waxaanu tilmaamay in ay xuquuq badan ku leeyihiin dalka, wasiirku wuxuu balan qaaday in ay dedaal u geli doonaan sidii loo soo celin lahaa karaamadii iyo sharaftii ay lahaan jireen Fanaaniinta Qaranku iyagoo ilaahay la kaashanaya.
Mudane Abiib Diiriye Nuur waxa uu ka dalbaday bah’da Fanka ee ku soo biirtay Wasaarada Warfaafinta oo ay ka mid ahaayeen in ay iyana Samir u yeeshaan mudada ay isla jaanqaadayaan.
Waxa kale oo iyana halkaa ka hadlay Abwaaniinta Axmed Saleebaan Bidde iyo Cali Caateeye, iyo Agaasimaha Guud ee wasaarada cayaaraha iyo dhalin yarada Mustafe Qodax.
Somalilandpost.net/Hargeysa