Hargeysa (SLpost)- Wasaaradda Diinta iyo Aw-Qaafta Somaliland ayaa ku dhawaaqday Magacyada Guddi Culimo ah oo loo Xil-saaray ka-talo-bixinta iyo isku soo dubba-ridka Qorshe loogu magac-daray La dagaalanka dhibaatooyinka Gudniinka Fircooniga ah.
Wasiirka Wasaaradda Diinta iyo Awqaafta Somaliland oo maanta hadal ka jeediyey kulan ay isugu yimaaddeen culimo ka kala socotay gobollada dalka oo ay si wada-jir ah u qaban-qaabiyeen Wasaaradda Diinta iyo hay’adda UNFPA, waxa uu sheegay in guddigani hay’adaha iyo Wasaaradaha ka shaqeeya aafada gudniinka fircooniga ah kala shaqeyn doonaa Qorshe wasaaradda Diinta iyo Aw-qaaftu u diyaarisay in lagu wejaho la-dagaalanka gudniinka Fircooniga ah.
Wasiirka oo arrimahan ka hadlayey, waxa uu yidhi, “Waxa aan la wada-soconnaa inay dalka ka socdaan dedaallo badan oo muddo dheer jiray oo dhinacyo kala duwan ah kuwaas oo u baahan in la mideeyo, si isku mid ahna looga wada-shaqeeyo arrinkan.Laga bilaabo hadda, waxaanu ku dedaali doonnaa inaan mideyno aragtida ku aaddan iyo in culimadu si toos ah uga qayb-qaataan la-dagaalanka dhibaatooyinka uu keeno Gudniinkani.
Wasiir Ahaan waxaan halkan kaga dhawaaqayaa Guddi culimo ah oo ah sagaal xubnood, kuwaas oo noqon doonaa Guddiga rasmiga ah ee ka shaqeeya arrimaha Gudniinka Fircooniga ah. Guddigani waxay si toos ah u hor iman doontaa Wasaaradda Diinta iyo Aw-qaafta, waxaanay si rasmi ah ugu shaqayn doonaan istaraatajiyadda ka-talinta arrimaha la xidhiidha Gudniinka Dumarka oo u baahan in la waafajiyo Shareecada Islaamka.”
Wasiirka oo hadalkiisa sii watay, waxa uu intaas ku daray, “Waxaan farriin ugu dirayaa cid kasta oo ka shaqaysa arrinkan hadday yihiin hay’adaha caalamiga ah, kuwa maxalliga ah iyo Wasaaradaha dowladdaba inay la shaqeeyaan Guddigan. Waxa kale oo aan soo jeedinayaa in dhammaan shuruucda iyo Mashaariicda iyo wax-qabadyada la xidhiidha arrinkan la waafajiyo shaqooyinka guddigan aan u xil-saaray oo aan sina shareecada uga maarmaynin,” Sidaas ayuu yidhi Sheekh Khaliif Cabdilaahi.
Ugu dambayntii waxa uu wasiirku halkaas kaga dhawaaqay magacyada Guddiga ka kooban 9 xubnood oo laga soo xulay culimada dalka, kuwaas oo magacyadoodu kala yihiin sida hoos ku xusan:-
- Sheekh Maxamed Cali Biixi – Sanaag
- Sheekh Cabdirisaaq Cali Xuseen (Albaani) – Togdheer
- Sheekh Siciid Xuseen Diiriye – Maroodijeex
- Sheekh Maxamed Macalin Aadan – Wasaaradda Diinta iyo Qaafta, Xidhiidhe
- Sheekh Jaamac Allaale Yuusuf – Saaxil
- Sheekh Xaamud Nadiif Axmed – Awdal
- Sheekh Cabdicasiis Xasan Faarax – Sool
- Sheekh Cabdilaahi Ibraahim Yuusuf – Maroodijeex
- Sheekh Cali Cabdilaahi Cilmi – Maroodijeex