Balli-gubadle, 08 April, 2012 (SLpost)- Kulan lagaga hadlayey la dagaalanka Maandooriyayaasha wada jirna ay u soo abaabuleen Maamulka Gobolka Hawd iyo Wasaarada Diinta iyo awqaafta ayaa lagu soo geba gebeeyey Magaala madaxda Gobolka Hawd ee Balli-gubadle.
Kulankan oo ay ka soo qayb galeen masuuliyiin ka kala socda Maamulka degmada, Gobolka, wasaarada diinta iyo awqaafta Gobolka Hawd, Culimaa’udiin iyo wax-garadka Gobolkaasi, waxa halkaasi ka hadlay Gudoomiyaha gobolka Hawd Jamaal xuseen Hurre, waxaanuu ka waramay sida loogu baahan yahay in xoogga la saaro sidii loolas dagaalami lahaa maandooriyayaasha iyo dhammaanba dhaqanada kale eek a baxsan anshaxa diinta islaamka, wax-yeelana ku ah dhaqanka suuban ee guud ahaan bulshada.
Mud. Jamaal waxa uu ka qayb galayaasha kulankaasi u soo jeediyey in ay lagama maar-maan tahay in si wada jir ah looga howl galo la dagaalanka Maandooriyayaasha oo ah xumaha Hooyadooda diinta suuban ee islaamkuna ay ka mamnuucday Muslimiinta.
Waxa kale oo iyana halkaasi ka hadlay Isuduwaha wasaarada aw-qaafta ee Gobolka, Xubno ka mid ah Culimaa’udiinka iyo wax-garadka ka soo qayb galay kulankaasi. Oo dhammaantoodba ka waramay sida ay waajibka u tahay in lala dagaalamo maandooriyayaasha oo ah wax aanu islaamku banaynin muslimiintana ka xaaraan-tinimeeyay.
Geba gebadii Kulankaasi waxa lagu dhisay guddi ka kooban toban xubnood oo uu gudoomiye u yahay C/risaaq Maxamed Yuusuf, gudigaasi oo loo xilsaaray ka howl galka iyo la dagaalanka maandooriyayaasha. Iyada oo la go’aamiyey in cidii lagu helo maandooriye la marin doono sharciga.
SLpost News
Hargeysa, Somaliland