Hargeysa, (SLpost) Ciidamada Booliska Somaliland oo garab iyo guubaabo laxaad leh ka helaya Wasaaradda Arrimaha Gudaha, Maamulka Gobolka Maroodi jeex iyo dawladda hoose ayaa saaka hiirtii waabari xoog ku soo galay xaafadda Jajabka oo ku taala dhabarka dambe ee wasaaradda Caafimaadka.
Inta la og yahay hal qof ayaa ku dhintay, dhawr kalena waxa ka soo gadhay dhaawacyo, ka dib markii ay rasaas laxaad leh ooda kaga qaadeen ciidamada Boolisku dadka rayidka ah ee iyagu degan xaafadaas.
Badibii guryihii ay ku jireen dadka rayidka ahi ayaa dhulka lala simay, kuwaas oo ay burburintooda si laxaad leh ugu hawlanayd Cagaf-cagaf ay leedahay dawladda hoose.
Maxamed Iid oo ah aabaha dhalay wiilka saaka lagu dilay xaafadaas oo warbaahinta la hadlayay ka dib geerida ayaa sheegay in ciidamadda booliska oo garabka ka helay maamulka caasimaddu ay ku waa bariisteen xafadooda, waxaana hadaladiisii ka mid ahaa “Saaka ayaa wiil aan dhalay lagu dilay isaga oo hor taagan gurigooda, qoladdan dhagaxaanta tuur tuuraysa iyo waxana muu ahayn, dabadeedna nin gaaban oo qori sita ayaa kala daba cararay oo ku dhuftay”
Wuu sii watay hadalkiisana waxaanu yidhi “Meeshan cid lagaga raray iyo dad la siiyay ogeysiis midnaba ma jirto, laakiin ciidamo ayuun baa saaka soo galay, waxaa nala balamay wasiirada caafimaadka iyo arrimaha gudaha ilaa haddana ma hayno oo noomay iman, laakiin mayorka oo wata ciidamo tiro badan ayuun baa noo yimid” Ayuu yidhi.
Dhinaca kale hooyo magaceeda ku soo koobtay Aamina oo u waramaysay warbaahinta, ayaa sheegtay in guryihii ay ku jireen aan loo aabo yeelin isla markaana ay burburiyeen “Ma garayno sida ay xukuumaddu saaka noola dhaqan tahay, isreal ayaan walaahi ula dhaqmin Falastiiniyiinta, ma waxa aad aragteen guri inta cagaf xagga dambe laga geliyay wixii ku jiray lagu duminayo” ayay tidhi.
Way sii wadatay, hadalkeedana waxaanay dhayda ka cadaysay in gurigii ay ku jirtay oo ay hanti badani ay u dhex taalay aanay waxba ka qaadan balse cagaf la geliyay “Cagaftaas aad hadda arkaysaan ayaa la geliyay, keliya waxa nalagu yidhi waxa aad kala soo baxdaan caruurta, laakiin intii kale waa lagu dumiyay” ayay tidhi.
Iska hor imaadka xukuumadda iyo shacabka ayaa noqonaya markii saddexaad ee sanadkan ay la kulanto xukuumadda madaxweyne Axmed Maxamed Maxamuud (Siilaanyo), waxaana dhawaan sidan oo kale ay shaqaaqo uga dhacday xaafadaha shacabka iyo Goljano, kuwaas oo lagu raray dad degan.